Հանրությունը պետք է իմանա, որ ջրային համակարգում մոտավորապես 8-ից 10.5 միլիարդ դրամի պարտք կա։ Այս մասին, այսօր՝ փետրվարի 15-ին, կառավարության նիստում հայտարարեց ՀՀ վարչապետ Նիկոլ Փաշինյանը:
«Խնդիրն ինչի մեջ է՝ մենք ունենք այսպիսի մեխանիզմներ, երբ ջուրը մատակարարվել է, ջրի դիմաց պարտք է գոյացել, պետք է հասկանանք՝ այդ պարտքը ինչպես է գոյացել։ Գյուղացիները չե՞ն վճարել, թե՞ գյուղացիները վճարել են, ընկերությունները չեն հաշվառել։ Քիչ հավանական է, որ գյուղացին չի վճարել, մենք ունենք վարկած, որ լուրջ կոռուպցիոն սխեմաներ են գործել»,- ասաց վարչապետը։
Ի պատասխան Պետական վերահսկողական ծառայության ղեկավար Դավիթ Սանասարյանն ասաց, որ այս թեմայով մարտի 15-ին կներկայացնեն ուսումնասիրություններ։ Նիկոլ Փաշինյանը հանձնարարեց այս հարցով շատ լուրջ զբաղվել։
Արտակարգ իրավիճակների նախարար Ֆելիքս Ցոլակյանը նշեց, որ երբեմն այն տվյալները, որ ունեն, կասկածելի են: «Վերջնական ճշտած որեւէ բան չենք կարող ասել, տեղումները շատանում են, բայց մարզեր կան, որ ձյուն չկա, Տավուշի, Լոռու մարզում չկա ընդհանրապես ձյուն»,- ասաց նա եւ խնդրեց ժամանակ տրամադրել Բնապահպանության նախարարության հետ հարցը քննարկել եւ միասնական հանդես գալ:
