Լրատվամիջոցների գտնվելը մեկ իրավական եւ հարկային դաշտում ոլորտը կկարգավորի: Փետրվարի 15-ին տեղի ունեցած քննարկման ժամանակ այս մասին ասաց Հայաստանի Ժուռնալիստների միության նախագահ Սաթիկ Սեյրանյանը:
Նրա խոսքով՝ սա կարող է լրատվամիջոցների համար հավասար ֆինանսական եւ իրավական պայմաններ ստեղծել: «Մենք մշտապես հանդես ենք եկել զանգվածային լրատվամիջոցների համար հավասար պայմանների օգտին: Սրա համար պետք է բոլոր ռեսուրսները գործեն մեկ հարկային եւ իրավական դաշտում»,- նշեց նա:
Սեյրանյանը հավելեց, որ բացի տնտեսական մրցակցային բաղադրիչից, կա նաեւ ոլորտում հեղինակային իրավունքների պաշտպանության իրավական կարգավորման խնդիրը: «Թափանցիկությունը թույլ կտա խուսափել այն խոսակցություններից, թե ում է պատկանում այս կամ այն ռեսուրսը կամ ալիքը: Դա քաղաքացիներին թույլ կտա լրատվամիջոցների մասին ավելի ամբողջական պատկերացում կազմել: Լրատվամիջոցների գործունեությունը կարող է գնահատել միայն դիտողը կամ ընթերցողը: Անհրաժեշտ է պայմաններ ստեղծել, որպեսզի նա կարողանա իր ընտրությունը գիտակցված կատարել»,- եզրափակեց նա: