ԱՄՆ պաշտպանության նախարարի պաշտոնակատար Փաթրիկ Շանահանը խոստացել է այսուհետ եւս աջակցել «Իսլամական պետության» դեմ պայքարին, տեղեկացնում է AFP-ն։
«Մենք միասին վերադարձրինք այն տարածքի 99 տոկոսի վերահսկողությունը, որը մի ժամանակ «ԻՊ»-ն անվանում էր իր այսպես կոչված խալիֆայության մի մաս»,- նշել է Շանահանը։
Նրա խոսքով՝ թեեւ ԱՄՆ-ը դադարեցնում է իր ռազմական ներկայությունը Սիրիայում, Վաշինգտոնը նախկինի պես հավատարիմ է կոալիցիային, որպեսզի հաղթի «ԻՊ»-ին ինչպես Մերձավոր Արեւելքում, այնպես էլ նրա սահմաններից դուրս։ Նա նշել է, որ ԱՄՆ-ը «պահպանում է հակաահաբեկչական հնարավորությունները տարածաշրջանում» եւ «շարունակում է աջակցել տեղի գործընկերներին՝ դիմակայել «ԻՊ» մնացուկներին»։
Գերմանիայի պաշտպանության նախարար Ուրսուլա ֆոն դեր Լեյենը նախազգուշացրել է, որ թեեւ «ԻՊ»-ը կորցրել է տարածքների մեծ մասի վերահսկողությունը, այն դեռ պարտված չէ։
«Մենք պետք է ընդունենք այն փաստը, որ «ԻՊ»-ը հիմա փոխում է իր դեմքը, անցնում է ընդհատակ եւ ցանցեր է կառուցում, այդ թվում եւ ահաբեկչական այլ խմբերի հետ»։
Ֆրանսիայի զինված ուժերի նախարար Ֆլորենս Փարլին ասել է, որ «միջազգային հանրությունը պետք է երաշխավորի, որ «ԻՊ»-ը չի վերածնվի Սիրիայում կամ որեւէ այլ տեղում»։