Եվրոպայում ամենաերկար ճոպանուղին կմիացնի Խորվաթիայի հյուսիս-արեւմուտքում Ադրիատիկ ծովի ափին գտնվող Մեդվեյու գյուղը եւ Վոյալ լեռան գագաթը, փոխանցում է «Եվրապուլսը»:
Երթուղու երկարությունը կկազմի 4,7 կմ, այն կբարձրանա 1,3 կմ: Ամբողջ ճանապարհորդությունը կտեւի 8,5 րոպե: Ճոպանուղին 1 ժամում կարող է տեղափոխել մինչեւ 310 ուղեւորի՝ առավելագույնը 60 մարդու համար նախատեսված վագոններով:
Նոր ճոպանուղու գլխավոր խնդիրն է Խորվաթիայի հյուսիսային ափը զբոսաշրջիկների համար առավել գրավիչ դարձնելը, որոնք հիմա ավելի մեծ հաճույքով երկրի հարավ են մեկնում: Նախատեսվում է շինարարությունը սկսել 2020 թվականին եւ ամբողջ աշխատանքն ավարտել 12-15 ամսում:
Խորվաթիայի ճոպանուղին Եվրոպայում ամենաերկարի կոչումը կնվաճի նիժեգորոդյան ճապանուղուց, որը իրար է կապում Նիժնի Նովգորոդը եւ Բորը, որոնք գտնվում են Վոլգայի հակադիր ափերին. ճոպանուղու երկարությունը 3,6 կմ է: Իսկ Եվրամիությունում առաջնության արմավենին առայժմ պատկանում է գերմանական ճոպանուղուն, որը զբոսաշրջիկներին բարձրացնում է ալպիական Ցուգշպիտցեի գագաթ: