Մենք չէինք սպասում, որ «ընդդիմություն» բառը կարող է վերածվել ծաղրի, պահանջների եւ որոշ դեպքերում՝ նույնիսկ սպառնալիքի: Այս մասին փետրվարի 18-ին ԱԺ-ում ավանդական ճեպազրույցների ժամանակ ասաց «Լուսավոր Հայաստան» կուսակցության եւ նույն խմբակցության ղեկավար Էդմոն Մարուքյանը:
Քաղաքական գործիչը նշեց, որ Ազգային ժողովի վերջին նիստում եւ դրանից հետո կուսակցությունը մի շարք կառավարական լրատվամիջոցների կողմից ատելության լուրջ դրսեւորման, հարձակումների է ենթարկվել, որոնք քննադատություն են թափել կեղծ տեղեկությունների տեսքով:
Մարուքյանը չհամաձայնվեց ԱԺ փոխխոսնակ Լենա Նազարյանի այն դիտարկմանը, թե սա առաջին դեպքն էր, երբ ընդդիմությունը կարողացավ կառավարության ծրագրին դեմ քվեարկել՝ ակնարկելով, որ ճնշում չի եղել: «Իսկ նրանք ի՞նչ կարող էին անել: Կապելո՞ւ էին մեր ձեռքերը եւ թույլ չէի՞ն տալու քվեարկել: Եթե սա նրանց համար առաջընթաց է համարվում, ապա ես անկեղծորեն ափսոսում եմ»,- շեշտեց ԼՀ ղեկավարը:
