Հայաստանի 24 համայնքներում փետրվարի 17-ին կայացած ՏԻՄ ընտրություններում «Քաղաքացիական պայմանագիր» կուսակցությունը թեկնածուներ չի առաջադրել: Կուսակցության 7 անդամները ինքնաառաջադրվել են: Փետրվարի 18-ին ԱԺ-ում ավանդական ճեպազրույցների ժամանակ ասաց «Իմ քայլը» իշխող դաշինքից ԱԺ փոխխոսնակ Լենա Նազարյանը:
Նրա խոսքով՝ կան համայնքներ, որտեղ նրանց կուսակցության անդամները հաղթանակ են տարել եւ համայնքներ, որտեղ պարտվել են: Եվ այս ամենն լիովին նորմալ է:
Հարցին՝ ինչպես է ստացվել, որ Ուրցաձոր գյուղի ղեկավարը նորից ընտրվել է գյուղապետ, որին գործող իշխանությունները փաստացի հեռացրել էին պաշտոնից: Նազարյանը պատասխանեց, որ դա քաղաքացիների որոշումն էր եւ նրանք արել են իրենց ընտրությունը:
Նա նաեւ հավաստիացրեց, որ ցանկության դեպքում կուսակցությունը կարող էր բոլոր 24 համայնքներում թեկնածուներ առաջադրել եւ նրանք հաղթելու բոլոր հնարավորությունները կունենային, սակայն իշխանությունները չեն ցանկանում մենաշնորհային դարձնել քաղաքական դաշտը:
«Մենք հատկապես ցանկանում ենք ազատ թողնել ՏԻՄ ընտրությունները՝ անկախ նրանից նրանք կուսակցության անդամներ են, թե ոչ եւ որ բնակիչներն իրենք որոշեն՝ ում են նրանք ցանկանում տեսնել իրենց բնակավայրի ղեկավարի պաշտոնում», - ասաց նա:
Նշենք, որ կիրակի կայացած ընտրություններին բացի Ուրցաձորից վարչապետ Նիկոլ Փաշինյանի կուսակցության անդամները պարտվել են նաեւ մի քանի գյուղերում: Վարդենիս քաղաքում իշխող կուսակցության անդամը եւս պարտություն էր կրել՝ զբաղեցնելով 6-րդ տեղը: