Անցյալ շաբաթ խորհրդարանական խմբակցությունների ներկայացուցիչները հանդիպումներ են անցկացրել Ռուսաստանի Պետդումայի ԱՊՀ, եվրասիական ինտեգրման եւ հայրենակիցների հետ կապերի գործերով կոմիտեի ղեկավար Լեոնիդ Կալաշնիկովի գլխավորած պատվիրակության հետ, բոլոր շփումները հաջող են անցել: Այս մասին փետրվարի 18-ին ԱԺ-ում ավանդական ճեպազրույցների ժամանակ ասաց ԱԺ Եվրասիական եւ տարածաշրջանային ինտեգրման մշտական հանձնաժողովի նախագահ, «Բարգավաճ Հայաստան» խմբակցության պատգամավոր Միքայել Մելքումյանը:
Նա նշեց, որ հանդիպման ժամանակ շեշտվել է 2 երկրների միջեւ միջպետական հարաբերությունների համատեքստում օրենսդիր մարմինների փոխշահավետ համագործակցության կարեւորությունը:
Ընդ որում՝ պատգամավորը հավաստիացրեց, որ Ռուսաստանի եւ Հայաստանի հարաբերությունները եղել են եւ մնում են բարձր մակարդակի վրա, իսկ ՌԴ Պետդումայի կոմիտեի նախագահը հանդիպման ժամանակ ընդգծեց, որ գործընկերային համագործակցության ձեւաչափը լրացնում է 2 երկրների միջեւ հարաբերություններում գոյություն ունեցող քաղաքական երկխոսության բարձր մակարդակը: «Մենք շեշտեցինք տարբեր միջազգային հարթակներում փոխշահավետ համագործակցության կարեւորությունը եւ քննարկեցինք հնարավորությունների սպեկտրը, որոնք նպաստում են 2 ժողովուրդների միջեւ հոգեւոր եւ մշակութային կապերի խորացմանն ու ընդլայնմանը»,- եզրափակեց Միքայել Մելքումյանը: