ԱՄՆ նախագահ Դոնալդ Թրամփը Եվրահանձնաժողովի ղեկավար Ժան Կլոդ Յունկերին խոստացել է, որ առայժմ եվրոպական ավտոմեքենաների ներկրման համար լրացուցիչ տուրքեր չի սահմանի։ Այս մասին հայտարարել է ինքը՝ Յունկերը՝ հայտնում է Reuters-ը։
«Թրամփն ինձ խոստացել է, որ առայժմ ավտոմեքենաների վրա որեւէ տուրք չի լինի։ Ես այդ խոստումը դիտարկում եմ որպես մի բան, որի վրա դուք կարող եք հույս դնել»,- Stuttgarter Zeitung թերթին ասել է Յունկերը։ Նա չի հստակեցրել, թե երբ է Թրամփը խոստացել։ Նրա խոսքերով, եթե Թրամփը տուրքեր սահմանի եվրոպական ավտոմեքենաների վրա, ԵՄ-ն անհապաղ կարձագանքի եւ իրեն պարտավորված չի զգա կատարելու ԱՄՆ-ից ավելի շատ սոյա եւ հեղուկ գազ գնելու իր խոստումը։
Եվրահանձնաժողովի ներկայացուցիչը հայտարարել է, որ ԵՄ-ն ուզում է բարելավել առեւտրային հարաբերությունները Միացյալ Նահանգների հետ, սակայն անմիջապես կարձագանքի, եթե Թրամփը որոշի տուրքեր սահմանել։
