Արմավիրի մարզի Վարդանաշեն համայնքի մի քանի բնակիչներ նախկին դպրոցի տարածքում բնակություն հաստատելու համար վճարել են գյուղապետ Արթուր Մանուկյանին, իսկ հետո պարզվել է, որ այն իրենց տրամադրված է եղել անհատույց: NEWS.am-ի հետ զրույցում այդ տարիներին ավագանու անդամ Ազատ Գրիգորյանն ասաց, որ ինքն էլ է ստորագրել այն փաստաթղթի տակ, որով ասվում է՝ տարածքը տրամադրվում է անհատույց. «Իմ ստորագրությունը կա, որ այս շենքը՝ նախկին դպրոցը, անհատույց տրամադրել համայնքի բնակիչներին, բայց դրա փոխարեն գումարներ են շորթվել»,- պատմեց նա:
Տարածք ստացած գուղացիներից մեկն ասաց, որ ինքը գյուղապետին առձեռն վճարել է 600 հազար դրամ, իսկ 166 հազար դրամ վճարել է դպրոցի գրքերի համար. «Վճարելուց հետո իմացել ենք՝ անհատույց է, ինչի՞ համար 600 հազար դրամ վճարեմ, եթե ինձ խաբել են, եթե դա տրվել է անհատույց: Կարող էի վճարել միայն պետական արժեքը՝ ասենք 35 հազար դրամ»:
Նա ասաց, որ իր պես հինգ-վեց մարդ կա, որ գյուղապետին մինչև 1 մլն դրամ վճարել են առձեռն՝ անհատույց տրվող տարածքի համար. «Թող կանգնեն, ասեն՝ ժողովուրդը սուտ է խոսում»,- հավելեց նա:
Մեկ այլ գյուղացի էլ հավելեց, որ գյուղապետը ժամկետ էր նշանակել գումարը վճարելու համար. «Ժամ էր դրել վրեքներս»,-ասաց նա:
Հիշեցնենք, որ փետրվարի 18-ին կայացած ՏԻՄ ընտրություններում ընտրվել է չորս ամիս առաջ հրաժարական տված գյուղապետ Արթուր Մանուկյանը, որին գյուղացիները վերագրում են շորթման այս դեպքերը:
