Սոչիում հանդիպումների ժամանակ «Բարգավաճ Հայաստան» կուսակցության ղեկավար Գագիկ Ծառուկյանն առաջարկել է մեր երկրում ԵՏՄ երկրների համար ազատ տնտեսական գոտի ստեղծել:
Փետրվարի 19-ին Ազգային ժողովում Պետդումայի ԱՊՀ, եվրասիական ինտեգրման գործերով եւ հայրենակիցների հետ կապերի կոմիտեի նախագահ Լեոնիդ Կալաշնիկովի գլխավորած պատվիրակության հետ հանդիպման արդյունքներն ամփոփող ասուլիսի ժամանակ ասաց ԱԺ Եվրասիական եւ տարածաշրջանային ինտեգրման հարցերի մշտական հանձնաժողովի նախագահ, «Բարգավաճ Հայաստան» կուսակցությունից պատգամավոր Միքայել Մելքումյանը:
Քաղաքական գործիչն ընդգծեց, որ ազատ տնտեսական գոտին ենթադրում է մաքսային սահմանի բացակայություն, հարկերից ազատում, մտավոր սեփականության արագ գրանցում եւ ապահովագրության առկայություն:
Բացի այդ, պատգամավորը պարզաբանեց, որ եթե բոլորը որոշել են Եվրասիական տնտեսական միության շրջանակներում լիարժեք ինտեգրման ճանապարհով գնալ, ապա նշանակում է, որ ռուսական բանկերը կարող են Հայաստանում նմանատիպ տոկոսադրույքներով վարկեր տրամադրել:
«Դա նաեւ նշանակում է, որ ընդհանուր էներգետիկ շուկան, գազի եւ էլեկտրաէներգիայի սակագները, ինչպես նաեւ տրանզակցիոն ծախսերը եւ մատակարարման լոգիստիկան պետք է համադրելի լինեն: Էլ ինչի համար է անհրաժեշտ ինտեգրումը», - նկատեց Մելքումյանը:
