ԱՊՀ 7 երկրների հատուկ ծառայություններն այս տարվա աշնանը Հայաստանում «Արարատ-Հակաահաբեկչություն– 2019» զորավարժություններ կանցկացնեն: Այդ մասին հայտարարել է ԱՊՀ Հակաահաբեկչական կենտրոնի ղեկավար Անդրեյ Նովիկովը, գրում է «ՌԻԱ Նովոստին»:
«Մեր խորհրդակցության ժամանակ քննարկման առարկա կլինի առանձին հարց՝ ԱՊՀ մասնակից պետությունների համապատասխան մարմինների համատեղ հակաահաբեկչկան «Արարատ-Հակաահաբեկչություն– 2019» զորավարժություններին նախապատրաստումը: Զորավարժությունները կանցկացվեն ՀՀ տարածքում այս տարվա աշնանը», - ասել է Նովիկովը:
Որպես զորավարժությունների թեմա է ընտրվել վառելիքաէներգետիկ համալիրի օբյեկտներում ահաբեկչական հարձակումների հայտնաբերումն ու կանխումը:
«Ներկայացվում է շատ քիչ հավանական սցենար, որ Հայաստանի տարածք կարող են ներթափանցել խոշոր ահաբեկչական կազմավորումներ, սակայն վառելիքաէներգետիկ համալիրի ռազմավարական կարեւորության օբյեկտներում «քնած բջիջների» կողմից սպառնալիքը պետության հատուկ ծառայության ուշադրության կենտրոնում է եւ պետք է կանխվի », - պարզաբանել է Նովիկովը:
Շեշտը կդրվի նաեւ նախազգուշական օպերատիվ բովանդակության վրա եւ հնարավոր է, օպերատիվ-մարտական միջոցառումների, որոնք ուղղված են պայմանական ահաբեկիչների եւ նրանց հանցակիցների հայտնաբերմանը եւ չեզոքացմանը:
ԱՊՀ երկրների հակաահաբեկչական կենտրոնների ղեկավարների խորհրդակցությանը մասնակցել են ինը երկրների ներկայացուցիչներ`Ադրբեջանի, Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի, Թուրքմենստանի եւ Ուզբեկստանի:
