Հայաստանի ԱԳՆ ղեկավար Զոհրաբ Մնացականյանի հայտարարությունները եւ Ղարաբաղի կարգավիճակի մասին հարցի փոքրացումն ընդհանուր առմամբ մտահոգիչ են։ Այս մասին NEWS.am-ի թղթակցի հետ զրույցում ասել է «Մեկ Հայաստան» կուսակցության հիմնադիրներից Արթուր Ղազինյանը։
Նրա խոսքով՝ Հայաստանը պետք է հասնի Ղարաբաղի ճանաչմանը միջազգային իրավունքի սկզբունքների հիման վրա։ «Խոսքը Լեռնային Ղարաբաղի Հանրապետության միջազգային ճանաչման մասին է նրա ներկայիս սահմաններում՝ անվտանգության ապահովման մեխանիզմների հիման վրա։ Դրա համար անհրաժեշտ է տնտեսության զարգացման քայլեր ձեռնարկել, ինչպես նաեւ համախմբել հասարակությունը»,- նշել է նա։ Ղազինյանն ընդգծել է, որ Հայաստանի իշխանությունների դիրքորոշումը ղարաբաղյան կարգավորման վերաբերյալ մինչեւ վերջ պարզաբանված չէ։ «Մենք կարծում ենք, որ Ղարաբաղի անկախության ճանաչման հարցը չպետք է հանվի օրակարգից։ Բայց փակ սահմանները եւ սահմանափակ հնարավորությունները չեն կարող արդարացում լինել, թե Հայաստանը չպետք է զարգացնի տնտեսությունը եւ ներդրումներ ներգրավի։ Առանց տնտեսական զարգացման համապատասխան մակարդակի չի կարելի խոսել անվտանգության բարձր մակարդակի մասին»,- ասել է փետրվարի 19-ին ստեղծված նոր քաղաքական կուսակցության ղեկավարը։
Արթուր Ղազինյանը նշել է, որ մտահոգիչ է նաեւ Փաշինյանի ու Ալիեւի հաղորդակցման ձեւաչափը, ինչպես նաեւ այն փաստը, որ հասարակությունն, ըստ էության, չգիտի, թե ինչի մասին է խոսվում այդ հանդիպումներում։
