Huawei Technologies Co Ltd-ի հիմնադիր եւ գործադիր տնօրեն Ռեն Չժենֆեյը խոստացել է հաճախորդների մասին տեղեկատվությունը չփոխանցել Չինաստանի կառավարությանը եւ հայտարարել է, որ ընկերությունը երբեք նման բան չի արել։

CBS News-ին տված հարցազրույցում Չժենֆեյը նշել է, որ «վերջին 30 տարիների ընթացքում մենք երբեւէ դա չենք արել, եւ (հետագա 30 տարիներին էլ) մտադիր չենք անել»։ Նրա խոսքերով, ընկերությունը ներգրավված չի եղել հետկուլիսյան ինտրիգներում եւ Պեկինին չի փոխանցել հաճախորդների մասին տեղեկատվություն։ «Դա անհնար է»,- ասել է նա CBS-ին՝ հայտարարելով, որ եթե նման բան լիներ Միացյալ Նահանգները արդեն այդ մասին հայտնած կլինեին։

Նա նշել է, որ ընկերությունը չի զբաղվի լրտեսական գործունեությամբ, եւ որ ինքը իր բիզնես-ներդրումները կարող է տեղափոխել այլ երկրներ, եթե շարունակվեն ընկերության վրա ԱՄՆ-ի ճնշումները։

Միացյալ Նահանգներն իրենց դաշնակիցներին կոչ են անում չօգտագործել Huawei-ի տեխնոլոգիան՝ զգուշացնելով, որ դրանք կարող են օգտագործվել լրտեսության համար։ Huawei-ը բազմիցս հերքել է այդ մեղադրանքները։