Բանկային հսկողության եվրոպական գերատեսչությունը (EBA) սկսել է Դանիայում եւ Էստոնիայում Danske Bank-ի էստոնական բաժանմունքի միջոցով փողերի լվացման գործի պաշտոնական հետաքննությունը, տեղեկացնում է DW-ն՝ հղում կատարելով EBA-ի մամուլի ծառայությանը։
Քննչական գործընթացներն իրականացվում են էստոնական Ֆինանսական տեսչության եւ դանիական Ֆինհսկողության դեմ։ «Հետաքննությունն սկսվել է Եվրահանձնաժողովի կողմից նամակ ստանալուց հետո, որում կոչ էր արվում EBA-ին՝ օգտագործել լիազորությունները ստուգելու՝ կարո՞ղ էին արդյոք էստոնական եւ դանիական իրավասու մարմինները չկատարել իրենց պարտավորությունները Եվրամիության օրենսդրության շրջանակներում»,- պարզաբանել են մամուլի ծառայությունում։
Երեքշաբթի օրը՝ փետրվարի 19-ին, Էստոնիայի Ֆինտեսչությունը տեղեկացրել է, որ Danske Bank-ի ստորաբաժանումը պետք է ութ ամսվա ընթացքում դադարեցնի գործունեությունը երկրում։
Էստոնիայի դատախազությունը հայտարարել է, որ քրեական հետաքննություն է հարուցել Danske Bank-ի էստոնական բաժանմունքի հանդեպ 2018 թվականի հուլիսին։ Քննության վարկածով՝ 2007-2015 թվականներին մասնաճյուղը մասնակցել է ընդհանուր առմամբ 8 մլրդ դոլարի լվացմանը։ Սկանդալի հետ կապված՝ պաշտոնից հեռացել է Danske Bank-ի տնօրեն Թոմաս Բորգենը։