Քննչական կոմիտեն և դատախազությունը շինծու գործ են հարուցել: Այս մասին այսօր՝ փետրվարի 19–ին, Երեւանի ընդհանուր իրավասության դատարանի Ավան եւ Նոր Նորք վարչական շրջանների նստավայրում լրագրողների հետ զրույցում հայտարարեց «Ֆլեշ» ՍՊԸ-ի նախագահ Բարսեղ Բեգլարյանը («Ֆլեշի Բարսեղ»)։
Հարցին, թե ինչ նպատակով կարող էր դա արվել, «ինչ ունեն իր դեմ», գործարարը պատասխանեց. «Դուք շատ լավ գիտեք, թե ինչ ունեն, ինձ թվում է՝ փակագծերի տակ լավ գիտեք, թե Բարսեղ Բեգլարյանը ով է, ում բարեկամն է, և ում ընկերն է»։
Բեգլարյանը նշեց, որ հեղափոխությունից հետո իշխանությունները չեն խոչընդոտել իր աշխատանքին։
Հարցին, թե մտավախություն չունի՞, որ վառելիքի շուկայում նոր ներմուծողները դուրս կմղեն «Ֆլեշ» ՍՊԸ-ին, գործարարը պատասխանեց. «Ինչի՞ց պետք է վախենամ, մենք այնպիսի հրաշալի վարչապետ ունենք, այնպիսի հրաշալի կառավարություն, որ մարդիկ ասել են՝ բիզնեսը ազատ ա, խի՞ պիտի վախենանք»։
Հարցին՝ ներկայումս այս ոլորտում կա արդյոք մենաշնորհ, Բեգլարյանն արձագանքեց. «Մենաշնորհ երբեք չի եղել և չկա և չի էլ լինելու. «ՍիՓիԷսը», «Ֆլեշը», «Մաքսը», «Ռան Օյլը», «Տիտանը», էնքան կային ֆիրմաներ, երբեք չի եղել մենաշնորհ»»։
Հիշեցնենք, որ «Ֆլեշ» ՍՊԸ-ի նախագահ Բարսեղ Բեգլարյանը մեղադրվում է բռնություն գործադրելու սպառնալիքներով ինքնիրավչություն կատարելու համար։ Բարսեղ Բեգլարյանի նկատմամբ ընտրված խափանման միջոցը՝ ստորագրություն չհեռանալու մասին, դատախազությունը փոխել էր անձնական երաշխավորությամբ։