ԱՄՆ-ը Չինաստանից յուանը չարժեզրկելու խոստումներ է պահանջում այն համաձայնագրի շրջանակներում, որը կոչված է վերջ դնել երկրների միջեւ առեւտրային պատերազմին։
Երկու երկրների ներկայացուցիչները, ովքեր վերսկսել են Վաշինգտոնում բանակցությունները, քննարկում են ինչպես արտացոլել արժութային քաղաքականությունը «Փոխհասկացվածության հուշագրում», որը հիմք կհանդիսանա ԱՄՆ-ի եւ Չինաստանի միջեւ առեւտրային գործարքի համար՝ հայտնում է Bloomberg-ը։
ԱՄՆ ֆինանսների նախարար Սթիվեն Մնուչինը հոկտեմբերին Reuters-ին հայտարարել էր, որ արժույթի հարցերը պետք է ԱՄՆ-ի եւ Չինաստանի միջեւ առեւտրային բանակցությունների մասը լինեն, եւ որ չինացի պաշտոնյաններն իրեն ասել են, թե յուանի կուրսի իջեցումն իրենց շահերից չի բխում։
Bloomberg-ը նշում է, որ յուանի կուրսը պահպանելու ԱՄՆ-ի պահանջներն ուղղված են նրան, որպեսզի բացառվի ամերիկյան տուրքերին հակազդելու համար Պեկինի կողմից իրենց արժույթի արժեզրկումը։