Բրիտանական պարբերականի փորձագետները նշել են արկածասերների 50 զբոսաշրջային երթուղիները։ Ցուցակում հայտնվել են ինչպես ոտքով, այնպես էլ հեծանվային զբոսանքները, ջրային արկածները, մոտոցիկլով արշավներն ու ուղեւորությունները, տեղեկացնում է Turizm-ը։

Վարկանիշի առաջին տեղում ուղեւորությունն է Իսպանիա, ավելի ճիշտ՝ իսպանական Պիրենեյներ։ Զբոսաշրջիկները մեկնում են հեռավոր լեռնային ճամբար, որտեղից փորձառու ուղեվարի հետ գնում են ուսումնասիրելու վայրի բնությունը։ Երթուղու ամենահետաքրքիր մասը գորշ արջերին հետեւելն է բնական պայմաններում։

Թոփ-50-յակը շարունակում է ճանապարհորդությունը Հյուսիսային Վիետնամով եւ Լաոսով, որը ներառում է Մայ Չաուի բրնձի պլանտացիաները, Վիենգ-Հայ քարայրները եւ Nam Et-Phou Louey արգելոցը։ Հետաքրքիր է, որ տարեկան այնտեղ հասնում է լոկ 80 զբոսաշրջիկ։

Արկածների ցուցակում հայտնվել է արշավը Ռուանդայի գորիլաների եւ շիմպանզեների մոտ, ծանոթությունը Բութանի ձնեմարդի լեգենդին, ճամփորդությունը Կարիբյան ավազանի դրախտային կղզիներով՝ Սենթ Լյուսիա, Անտիգուա եւ Մոնթսերատ, ուխտագնացությունը Ադամի գագաթ Շրի Լանկայում եւ Շվեյցարիայի Կերնհորմս ազգային պարկով՝ Լայրիգ Գրու վայրի տեղանք այցելությամբ։

Մեծագույն արկածներ են անվանվել նաեւ ճամփորդությունը սամուրայի հետ Ճապոնիայի Տակադոնո հովտում, զբոսանքը Նամիբիայի անապատներով, Գերմանիայում՝ Յոհան Բախի երթուղով երաժշտական ուղեւորությունը, էկոլոգիական արշավը Դոմինիկի Վայթուկուբուլի ազգային երթուղով, որը տուժել էր «Մարիա» փոթորկից 2017-ին, փղերով զբոսանքը Քենիայում եւ հեծանվարշավը Մոնղոլիայի ազգային պարկերում։