Հայ արտադրողները հաճախ իրենք իրենց արտադրանքը չեն օգտագործում: Փետրվարի 20-ին լրագրողների հետ հանդիպմանն այս մասին ասաց Հայաստանի սպառողների պաշտպանության ազգային ակադեմիայի նախագահ Միլետա Հակոբյանը:
Նրա խոսքով՝ պետք չէ գնել ապրանքներ, որոնք բնական տեսք չունեն եւ պետք է հասկանալ, որ ռիսկի խմբում նախեւառաջ երեխաներն են:
«Կոնցենտրատները օգտագործվում են նաեւ հրուշակեղենում: Բացի դրանից կան նաեւ մսամթերքներում, կետչուպներում, զովացուցիչ ըմպելիքներում եւ այլ ապրանքներում», - նշեց նա:
Հակոբյանը ցուցադրեց ձուկ, որը ներկի հավելումներով վաճառվել է որպես կարմրախայտ:
«Նման ձուկ կերած մարդը կարող է լուրջ առողջական խնդիրներ ունենալ: Սա բացահայտ հալածանք է քաղաքացիների նկատմամբ», - ասաց ՀԿ ղեկավարը:
Միլետա Հակոբյանն ընդգծեց, որ ապրաքնի պիտակը պետք է խոշոր տառատեսակով գրված լինի:
«Եթե ԽՍՀՄ-ի ժամանակ մենք ամենաառողջ ազգերից էինք, ապա այժմ քաղցկեղի երիտասարդացում ունենք: Այս մասին մենք զգուշացնում էինք 15-20 տարի առաջ», - հավելեց նա:
Միլետա Հակոբյանը պարզաբանեց, որ նրանք ուկրաինական արտադրանքի ամբողջական արգելքին կողմ չեն եղել, այլ ասել ենք, որ պետք է ստուգել ներկրվող արտադրանքը:
«Ներկրողները պետք է ստուգված երկրներից որակյալ ապրաքն ներկրեն», - եզրափակեց նա: