Հայաստանում միգրացիան սարսափելի չափերի է հասել, հանրապետությունն այդ ցուցանիշով կայուն առաջին տեղն է զբաղեցնում ԱՊՀ երկրների շարքում, խորհրդարանի ամբիոնից հայտարարել է ՀՅԴ-ական պատգամավոր Լիլիթ Գալստյանը:
Նա ընդգծել է, որ հանրապետությունը լքում են ամենաստեղծագործ ուժերը, մարդիկ` բարձրագույն եւ միջնակարգ կրթությամբ: «Եթե այսպես շարունակվի, ապա ՄԱԿ-ի տվյալներով, արտագաղթը Հայաստանից կհասնի 200 հազարի, եւ դա այն ֆոնին, որ վերարտադրությունը Հայաստանում 84 տոկոսից իջել է 54 տոկոսի: ՄԱԿ-ի տվյալներով, մի քանի տարի անց Հայաստանի բնակչությունը կհասնի 1,5 միլիոնի»,- նկատել է Գալստյանը` ընդգծելով, որ Հայաստանի իշխանությունները որեւէ քայլ չեն կատարում ժողովրդագրական բացասական երեւույթները կանխելու ուղղությամբ, եւ, ընդհակառակը, խթանում են այն:
