Հայաստանի Ազգային ժողովի պատգամավորներ Գայանե Աբրահամյանը, Թագուհի Ղազարյանը, Զարուհի Հովհաննիսյանը եւ Սոս Ավետիսյանը, ինչպես նաեւ «Քաղաքացիական որոշում» կուսակցության անդամները մասնակցել են Վրաստանի արդարադատության համակարգում բարեփոխումներին նվիրված սեմինարին։
Սեմինարն անցկացվել է Վրաստանի մայրաքաղաք Թբիլիսիում փետրվարի 15-17-ին։
«Իմ քայլը» դաշինքի պատգամավոր Գայանե Աբրահամյանի խոսքով՝ կարեւոր է ուսումնասիրել Վրաստանի փորձն այս ոլորտում, քանի որ այդ երկիրը համադրելի է Հայաստանի հետ ինչպես քաղաքական, այնպել էլ մշակութային առումով։
Նրանք բավական էական բեկում են գրանցել։ «Գուցե մենք կարողանայինք դիտարկել այն փաստը, թե ինչ ճանապարհ ենք մենք անցել, եւ համեմատական վերլուծություն անցկացնեինք օրենսդրական առաջընթացի տեսակետից, բայց դրանց կիրառման մակարդակով Վրաստանը մեծ առաջընթաց ունի»,- ասել է Աբրահամյանը։
Անդրադառնալով Հայաստանում անհրաժեշտ փոփոխություններին՝ Աբրահամյանը նշել է դրանցից մի քանիսը։ Մասնավորապես, նա կարեւոր նշանակություն է տվել դատական մոնիթորինգի մեխանիզմների ներդրմանը։