Արցախի ոստիկանությունը ստուգում է Արցախի պաշտպանության նախկին նախարար Սամվել Բաբայանին Արցախի քաղաքացիությունից զրկելու վերաբերյալ տեղեկատվությունը։
Այս մասին NEWS.am–ին հայտնեցին Արցախի ոստիկանությունից՝ նշելով, որ Սամվել Բաբայանի դիմումը ստացել են և դրան սահմանված կարգով ընթացք կտան։
Սամվել Բաբայանը պնդում է, որ 2006թ. առանց իր իմացության իրեն զրկել են Արցախի քաղաքացիությունից։ Այս փաստը, ըստ նրա, վերջերս պարզել են իր փաստաբանները։
Ավելի վաղ՝ NEWS.am–ի հետ զրույցում Բաբայանն ասել էր, որ դիմել է Արցախի ոստիկանություն՝ պարզելու, թե ի՞նչ հիմքով են իրեն զրկել քաղաքացիությունից։
Հիշեցնենք, որ Սամվել Բաբայանը փետրվարի սկզբին բարձրաձայնել էր 2020-ին Լեռնային Ղարաբաղում կայանալիք նախագահական ընտրություններում իր թեկնածությունն առաջադրելու մասին։