NEWS.am–ի տեղեկություններով՝ փետրվարի 24–ին Կոտայքի մարզի Ջրվեժ գյուղում սպանված 29–ամյա Կարեն Խնուսյանը հանցավոր աշխարհում հայտնի էր որպես «Հունաստանի Կարեն»։ Մեր տեղեկություններով՝ նա հետախուզվում էր Ինտերպոլի կողմից։
Հունաստանի Սալոնիկ քաղաքի դատարանը 2015թ. նրան դատապարտել էր 57 տարի և 6 ամիս ազատազրկման՝ անձի առևանգման, սպանության, ապօրինի զենք կրելու և կողոպուտ կատարելու համար։ Մեկ տարի անց՝ 2016թ. ապրիլին, նրան 6 օրով արձակուրդ են տրամադրել, որից հետո նա չի վերադարձել քրեակատարողական հիմնարկ։
Այնուհետև Կարեն Խնուսյանին հաջողվել է վերադառնալ Հայաստան, որտեղ նրան երկու անգամ բերման են ենթարկել, վերջին անգամ՝ 2017թ. մարտի 10 –ին՝ Երևանում ՀՀ ՔՕ 327–րդ հոդվածի (Ժամկետային զինվորական կամ այլընտրանքային ծառայությունից, վարժական հավաքներից կամ զորահավաքներից խուսափելը) մեղադրանքով։
Նշենք, որ Խնուսյանը հաշվառված էր Արմավիրի մարզի Մերձավան գյուղում, սակայն երկար տարիներ է՝ գյուղում չի բնակվել։
Ավելի վաղ հայտնել ենք, որ 2019թ. փետրվարի 24-ին` ժամը 19:55-ին, Կոտայքի մարզի Ջրվեժ գյուղի առաջին դաշտում հայտնաբերվել է արական սեռի դի` կրծքավանդակի աջ և ձախ կեսի կողմնային մակերեսներին և աջ բազկի ստորին երրորդականի հետին մակերեսին հրազենային վնասվածքներով:
Դեպքի առթիվ ՀՀ ՔԿ Աբովյանի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով:
