Իրանի արտաքին գործերի նախարար Մուհամեդ Ջավադ Զարիֆն ասել է, որ իր հրաժարականը խթան կհանդիսանա, որպեսզի նախարարությունը վերադառնա իր օրինական տեղը, տեղեկացնում է Mehr-ը։
Ի պատասխան երկրի ԱԳՆ դիվանագետների եւ աշխատակիցների հայտարարության, թե իրենք հրաժարական կտան, եթե Զարիֆի հրաժարականն ուժի մեջ մտնի, նա խնդրել է գործընկերներին «ամբողջ ուժով կատարել երկրի պաշտպանության իրենց պարտականությունները եւ խուսափել (հրաժարական) տալուց։ Զարիֆը նաեւ հույս է հայտնել, որ իր հրաժարականը խթան կհանդիսանա Իրանի ԱԳՆ-ն միջազգային հարաբերություններում իր օրինական տեղը վերադարձնելու համար։
Զարիֆն իր հրաժարականի մասին հայտարարել է նախօրեին Instagram-ում։ Նրա խնդրանքը դեռեւս պետք է արժանանա նախագահ Հասան Ռոհանիի հավանությանը։
Օրենսդիրների մեծամասնությունը, սակայն, ստորագրել է նամակ՝ հաջակցություն վետերան դիվանագետի, որում նրան խնդրել են շարունակել աշխատել Իրանի արտգործնախարարի պաշտոնում։
Այսօր ազգային անվտանգության եւ արտաքին քաղաքականության խորհրդարանական կոմիտեն կանցկացնի արտահերթ նիստ՝ քննարկելու Զարիֆի հրաժարականը։
