Միլիարդատեր Իլոն Մասկը առաջարկում է մարդկանց վաճառել Երկրի վրա իրենց տունը եւ թռչել Մարս՝ որպես առաջին բնակիչներ։ Popular Mechanics-ին տված հարցազրույցում SpaceX-ի ղեկավարը պատմել է ապագա գաղութատերերի կենցաղի մասին, ինչպես նաեւ՝ հեռավոր տիեզերքի իրացման դժվարությունների մասին։
2024թ․ SpaceX-ը պլանավորում է առաջին տիեզերագնացներին տանել Մարս։ Նրանք կթռչեն տիեզերագնացության պատմության մեջ ամենահզոր հրթիռով՝ Starship պողպատյա պատիճով։ Ընկերությունն արդեն ստեղծել է սարքի փոքր մոդելը, իսկ փետրվարի սկզբին հաջողությամբ փորձարկել է դրա Raptor շարժիչը՝ հայտնում է HighTech-ը։
Սկզբում գաղութատերերը կապրեն տիեզերանավում եւ կմասնակցեն Mars Base Alpha բազայի ստեղծմանը։ 2020-ական թվականներին SpaceX-ը, որպես փոխադրող, պարբերաբար վերաբնակեցվածներ եւ բեռներ կտեղափոխի մոլորակ։
Մինչ այդ, ինչպես ակնկալում են ընկերությունում, նախագծին կմիանան այլ ընկերություններ։ Մասկի թիմի հետ նրանք Մարսը կդարձնեն բնակության համար պիտանի վայր։
Popular Mechanics-ին տված հարցազրույցում Մասկը պատմել է, որ Կարմիր մոլորակի յուրացման առաջին քայլը կլինի թեսթային բազայի կառուցումը։ Այն պլանավորում են կառուցել Լուսնի վրա։
Հաջորդ քայլը կլինի դեպի Մարս թռիչքը,ինչը դեռեւս Մասկին էլ է դժվար խնդիր թվում։ «Եթե դուք հասնեք այնտեղ եւ ողջ մնաք, ապա իմացեք, որ ամենադժվարը հետեւում է»,- ասել է նա։
Մասկն ասել է, թե սկզբում պետք է Մարսի վրա արեւային էներգիայի ստացման համակարգեր դնել, այնուհետեւ զբաղվել այնպիսի բույսերի աճեցմամբ, որոնք հողի եւ արեւի լույսի կարիք չունեն։
Մարսի վրա զբոսանքների համար հասարակական տարածություն ստեղծելու համար գործարարն առաջարկում է ապակե գմբեթի տակ այգի ստեղծել, որտեղ կարելի է առանց սկաֆանդրների քայլել։