Հայ-իրանական հարաբերությունները հարուստ եւ համապարփակ օրակարգ ունեն, եւ իմ այցի նպատակը այն զարգացնելն է: ԻՌՆԱ լրատվական գործակալությանը տված հարցազրույցում այս մասին ասել է ՀՀ վարչապետ Նիկոլ Փաշինյանը՝ պատասխանելով հարցին, թե որն է Թեհրան կատարած այցի օրակարգի ամենակարեւոր հարցը:
«Այս այցը կարելի է մեր երկրների միջեւ պարբերական երկխոսության եւս մեկ փուլ համարել: Կքննարկենք փոխադարձ հետաքրքրություն ներկայացնող հարցերի լայն շրջանակ: Ինչ վերաբերում է օրակարգի կարեւոր հարցերին, ապա պետք է նշել, որ մեր հարաբերություններում հայտնվել է նոր բաղադրիչ: Խոսքը ԵՏՄ-Իրան ազատ առեւտրի համաձայնագրի մասին է, որը առեւտրային եւ ներդրումային ոլորտներում անդամ երկրների համար նոր հեռանկարներ կբացի: Ինչպես գիտեք, համաձայնագիրը վավերացման փուլում է: Հուսով եմ, որ մոտ ապագայում իրավական գործընթացը կավարտվի, եւ գործնական արդյունքներին երկար չենք սպասի», - ասել է վարչապետը:
Ինչ վերաբերում է փաստաթղթերին, որոնք պետք է ստորագրվեն, ըստ Փաշինյանի, կողմերը ներկայումս աշխատում են մի շարք փաստաթղթերի պատրաստման ուղղությամբ՝ առաջիկա այցի ընթացքում դրանք ստորագրելու համար.
«Միեւնույն ժամանակ պետք է նշեմ, որ այսօր հայ-իրանական բազմապլանային հարաբերությունները կարգավորվում են ավելի քան 180 ստորագրված փաստաթղթերով: Այսինքն, արդեն գոյություն ունի հարուստ պայմանագրային, իրավական հիմք համագործակցության զարգացման համար»:
