Իսլամական հեղափոխության պահապանների կորպուսի «Քուդս» ստորաբաժանման հրամանատար, գեներալ-մայոր Կասեմ Սուլեյմանին Իրանի արտգործնախարար Մուհամմեդ Ջավադ Զարիֆին կոչ է արել հետ կանչել հրաժարականի իր դիմումը՝ հայտնում է Tasnim-ը։ Սուլեյմանին նշել է, որ Զարիֆը վայելում է Իրանի գերագույն առաջնորդ, այաթոլլա Սեյեդ Ալի Խամենեիի աջակցությունը եւ հովանավորությունը։
Սուլեյմանին, անդրադառնալով Զարիֆի հրաժարականի որոշման պատճառներին, նշել է, որ նախագահի աշխատակազմի կողմից «համակարգման որոշ թյուրիմացությունների» պատճառով Զարիֆը ներկա չի եղել Թեհրանում Իրանի եւ Սիրիայի նախագահների հանդիպմանը, ինչը առաջացրել է նրա վրդովմունքը։
«Փաստերը վկայում են այն մասին, որ Զարիֆի բացակայությունն այդ հանդիպմանը որեւէ նպատակ չի հետապնդել, եւ ես պետք է ընդգծեմ, որ նա Իրանի Իսլամական Հանրապետության քաղաքականության համար պատասխանատու ամենագլխավոր անձն է՝ որպես արտաքին գործերի նախարար»,- ընդգծել է հրամանատարը։
Հիշեցնենք, որ նախագահ Հասան Ռուհանին չի ստորագրել Զարիֆի հրաժարականի դիմումը՝ նշելով, որ դա կհակասեր երկրի շահերին։