Ոստիկանության աշխատակիցները գտել են գեներալ Մանվել Գրիգորյանի տղայի տունը թալանողներին:
Shamshyan.com-ի փոխանցմամբ, ավելի վաղ քրգործ էր հարուցվել է փետրվարի 24-ին Արշալույս գյուղի 17-րդ փողոցի 1-ին տնից կատարված գողության փաստով: Ոստիկանության Նոր Նորքի բաժնի քրեական հետախուզության բաժանմունքի ծառայողները, համագործակցելով ոստիկանության Վաղարշապատի բաժնի իրենց գործընկերների հետ, ստացված օպերատիվ տեղեկություններն իրացնելով, Վաղարշապատի ոստիկանություն են բերման ենթարկել Երեւան քաղաքի Նոր Նորք վարչական շրջանի բնակիչ 47-ամյա Գագիկ Մ.-ին: Վերջինս կասկածվում է 3 անձանց հետ նշված գողությունը կատարելու մեջ:
Ոստիկանները գողացված ապրանքների մի մասը հայտնաբերել են:
Աղբյուրի տեղեկություններով՝ Գագիկ Մ.-ն նախկինում դատապարտված է եղել ՀՀ քր օր-ի 104 հոդվածի 2-րդ մասի 5-րդ կետով, 104 հոդվածի 2-րդ մասի 8-րդ կետով, 175 հոդվածի 2-րդ մասի 1-ին կետով , 175 հոդվածի 2-րդ մասի 4-րդ կետով եւ 66 հոդվածի հատկանիշներով: Նա 2016 թ.-ի սեպտեմբերին Նուբարաշեն քրեակատարողական հիմնարկից ազատ է արձակվել պատժի լրիվ կրումով:
Նշենք, որ նշված տունը պատկանում է գեներալ Մանվել Գրիգորյանի տղային՝ Էջմիածնի նախկին քաղաքապետ Կարեն Գրիգորյանին:
Ավելի վաղ NEWS.am-ը հայտնել էր, որ փետրվարի 24-ին, ոստիկանության Վաղարշապատի բաժին էր դիմել Էջմիածին քաղաքի բնակիչ, 35-ամյա Հռիփսիմե Հակոբյանը եւ հայտնել, որ փետրվարի 23-ին, այցելելով Արշալույս գյուղի 17-րդ փողոցում գտնվող իր առանձնատուն, հայտնաբերել էր առաջին հարկի խոհանոցի պատուհանի երկաթյա ճաղավանդակը կոտրած, այնուհետեւ մտնելով ներս, հայտնաբերել է տունը տակնուվրա արված:
Աղբյուրի տեղեկություններով՝ Հ. Հակոբյանը ոստիկաններին հայտնել էր, որ անհայտ անձը կամ անձինք տան սենյակներից գողացել են տարբեր տեսակի իրեր, առարկաներ, բնանկարներ եւ այլ թանկարժեք ապրանքներ: Նրանք գողացել էին նաեւ ամուսնուն՝ 40-ամյա Կարեն Գրիգորյանին պատկանող հագուստները, ինչպես նաեւ «Վինչեստեր» տիպի հրացանը ՝ պատյանի եւ փաստաթղթերի հետ:
