Բանակում խաղաղ պայմաններում մահացած զինծառայողների մայրերը այսօր՝ փետրվարի 28-ին, կրկին կառավարության շենքի դիմաց էին։ Նրանք պահանջում էին ՀՀ վարչապետ Նիկոլ Փաշինյանի հետ հանդիպում։
Մահացած զինծառայողների մայրերը մտահոգություն են հայտնում, որ չնայած ՀՀ կառավարությունը հայտարարել է, որ առաջիկայում կվերանայվի հինգ աղմկահարույց քրեական գործեր՝ բանակում խաղաղ պայմաններում զինծառայողների մահվան դեպքերով, սակայն երկար տարիներ անց գործերն արդար քննել քննիչներն այլեւս չեն կարողանալու։
Բանակում խաղաղ պայմաններում մահացած Վալերիկ Մուրադյանի մորը՝ Նանա Մուրադյանին Քննչական կոմիտեում քննիչն ասել է, որ 9 տարի հետո գործը բացահայտելը դժվար է, քանի որ ապացույցները ոչնչացված են. «Քննչական կոմիտեում քննիչը ասում է՝ 9 տարի անցել է, ի սկզբանե հետքերը կորցվել են, իրեղեն ապացույցները ոչնչացվել են, գործը շիլաշփոթ է դարձվել։ 9 տարի հետո ես այս գործը ո՞նց քննեմ»։
Նանա Մուրադյանը պնդում է՝ գործի առաջին քննիչ Ապրեսյանին պետք է քրեական պատասխանատվության ենթարկեն գործը կոծկելու համար։
Մահացած զինծառայողների մայրերի հետ հանդիպեց ՀՀ վարչապետի օգնական Նաիրի Սարգսյանը, խոստացավ հարցով զբաղվել։
