Հյուսիսային Կորեայի ղեկավար Կիմ Չեն Ընը եւ ԱՄՆ նախագահ Դոնալդ Թրամփը Հանոյում հանդիպման ժամանակ պայմանավորվել են շարունակել երկկողմ հարաբերությունների քննարկումը, հայտնում են հյուսիսկորեական լրատվամիջոցները, փոխանցում է «ՌԻԱ Նովոստի»-ն:
Կորեայի Կենտրոնական հեռագրական գործակալությունը հայտնում է, որ Կիմ Չեն Ընն ու Թրամփը երկրորդ գագաթնաժողովը «լավ հնարավորություն» են անվանել՝ փոխվստահությունը խորացնելու եւ հարաբերությունները բարելավելու համար: Նրանք խոստացել են մեկ անգամ էլ հանդիպել՝ արդյունավետ երկխոսությունը շարունակելու համար:
ԱՄՆ եւ Հյուսիսային Կորեայի առաջնորդներ Դոնալդ Թրամփը եւ Կիմ Չեն Ընը փետրվարի 27-28-ը Հանոյում երկրորդ գագաթնաժողովն են անցկացրել, որն ավարտվել է առանց որեւէ փաստաթուղթ ստորագրելու: Թրամփը մամուլի ասուլիսում հայտարարել է, որ Հյուսիսային Կորեայի հետ տարաձայնությունները չեն վերաբերել պատժամիջոցները հանելուն, Փհենյանը զիջման չի գնացել «այլ ոլորտում»: