Հարկային օրենսգրքի առաջարկվող փոփոխությունների պատճառով «Հայ Կոլա» գործարանը կարող է փակման եզրին հայտնվել։ Այս մասին NEWS.am-ի հետ զրույցում ասաց «Հայ Կոլա» գործարանի տնօրեն Տիգրան Հովսեփյանը։
Գործարանի տնօրենը նշում է՝ ի սկզբանե հարկային օրենսգրքում առաջարկվում էր 100 գրամ գազավորված ըմպելիքի մեջ հինգ եւ ավելի գրամ շաքար պարունակող ըմպելիքները ակցիզային հարկով հարկել, սակայն իրենք «Հայ կոլա» գազավորված ըմպելիքները արտադրում են ոչ թե շաքարով, այլ քաղցրացուցիչով, էկոնոմ սեկտորի մեջ են մտնում. ««Հայ Կոլան» 22 տարի է՝ գործում է եւ շեշտը դրել է էկոնոմ դասի վրա, իսկ այսօր էկոնոմիկայի եւ առողջապահության նախարարության գործառույթները ստանձնած ֆինանսների նախարար Ատոմ Ջանջուղազյանի «հզոր» աշխատանքի շնորհիվ գործարանը փակման եզրին է։ Հիմա արդեն շաքարի մասին էլ խոսք չի գնում, ակցիզային հարկի առաջարկը տարածել են բոլոր գազավորված ըմպելիքների վրա, բացառությամբ՝ հանքային ջրի»։
Տնօրենի խոսքով՝ եթե Հարկային օրենսգրքի առաջարկվող փոփոխությունները ուժի մեջ մտնեն, իրենց արտադրանքը ուղղակի չի սպառվի. «Շուկայում «Հայ Կոլայի» արտադրանքը 1.5 լիտրանոցը սպառվում է 200 դրամ գնային սեգմենտում, եթե 1.5 լիտրի դիմաց վճարենք 45 դրամ ակցիզ, գումարած ավելացված արժեքի հարկ, այսինքն՝ 54 դրամ, ապրանքը 30 տոկոսով կթանկանա շուկայում եւ մեր ապրանքն ուղղակի չի սպառվի։ Եթե մեր արտադրանքը դառնա 200 դրամից 300 դրամ, շուկայում էլ գոյություն ունեն նեկտարատիպ, սակայն անհայտ բաղադրության, այսպես կոչված, «բնական հյութեր», որոնք ընդհանրապես բնական հյութի հետ կապ չունեն, սակայն շուկայում արժեն 260-270 դրամ, սպառողը մանրածախ խանութում 300 դրամով գնելո՞ւ է գազավորված ըմպելիքը, թե՞ 260 դրամով այսպես կոչված «բնական հյութը»։
Տիգրան Հովսեփյանի համոզմամբ՝ 30 տոկոս գնաճի դեպքում մուլտիպլիկատիվ էֆեկտով ամբողջ շղթան՝ մատակարարից մինչեւ վերջին սպառողը, խաթարվելու է։ «Շուկան մոնոպոլիզացվելու է, փոքր ընկերությունները շուկայից դուրս կմնան, մնալու են միջազգային բրենդները՝ «Կոկա Կոլա», «Պեպսի Կոլա»։
Նա վստահեցնում է՝ մենաշնորհների դեմ ենք պայքարում, բայց հիմա վերադառնում ենք ավելի ուժեղ մոնոպոլիզացիայի. «Պարոն Ջանջուղազյան, եթե դուք օրենքի նման փաթեթ եք մշակել, հաշվի առե՞լ եք այդ հետեւանքները։ Ասում եք՝ բյուջեի ճեղքը պիտի փակենք, բյուջեի ճեղքը իմ գործարանը փակելով եք փակելո՞ւ։ Եթե չգիտեք՝ ինչո՞ւ է բյուջեն ճեղքվածք տվել, հրաժարական տվեք, թող գա ավելի լավ ֆինանսիստ, որը կկարողանա փակել բյուջեն»։
«Հայ Կոլա» գործարանի տնօրենը պատմեց նաեւ փոխվարչապետ Մհեր Գրիգորյանի հետ տեղի ունեցած ժողովի մասին. «Ընդհանուր ժողով է եղել փոխվարչապետ Մհեր Գրիգորյանի հետ, որը եւս համաձայն է Ատոմ Ջանջուղազյանի հետ, որ օրենքի նախագիծը պետք է կիրառվի, չնայած, որ կազմվել է առանց մեզ հետ քննարկելու։ Շահառուներով՝«Հայ Կոլան», «Պեպսի կոլան», «Կոկա Կոլան», «Բջնին», «Կիլիկիան» մեկ ամիս առաջ դիմել ենք կառավարություն, խնդրել ենք հանդիպել, հանդիպման 10–րդ րոպեին պարոն փոխվարչապետն ասաց. «Մենք երեկ երեկոյան ձեզ համար անակնկալ ենք պատրաստել. ոչ միայն շաքար պարունակող, այլև բոլոր գազավորված ըմպելիքների վրա է տարածվում ակցիզային հարկի պահանջը»»։
Նրա խոսքով՝ սա կամայակայն օրենքի նախագիծ է. «Մենք պարտաճանաչ հարկատու ենք եղել, իսկ եղել հիմա եկել, մեզ ասում են՝ փակվեք։ Սա կամայակայն օրենքի նախագիծ է, որովհետեւ սկզբում ասում էին շաքար պարունակող ըմպելիքներին է սա վերաբերում, հետո ասում են՝ ո՛չ, բոլոր գազավորված ըմպելիքներին է դա վերաբերում։ Եթե գազավորված ըմպելիքներին է վերաբերում, ապա հանքային ջրերն էլ ներառեք»,– նշեց Տիգրան Հակոբյանը։
Նա եզրափակեց՝ եթե որեւէ լուծում չտրվի այս հարցին, իրենց այլ ելք չի մնում, քան փակվելը, իսկ դա ոչ մի լավ բանի չի հանգեցնի։
Հիշեցնենք, որ համաձայն շրջանառության մեջ դրված «Հայաստանի Հանրապետության հարկային օրենսգրքում փոփոխություններ եւ լրացումներ կատարելու մասին» ՀՀ օրենքի նախագծի՝ նախատեսվում է 2019 թվականի հուլիսի 1-ից ընդլայնել ակցիզային հարկով հարկման ենթակա ապրանքների շրջանակը՝ որպես ենթաակցիզային նոր ապրանք սահմանելով 100 գրամ ըմպելիքի մեջ հինգ եւ ավելի գրամ շաքար պարունակող ըմպելիքները, ապա նշվել է, որ խոսքը բոլոր գազավորված ըմպելիքներին է վերաբերում։
