Պարկամկանը խժռող թռչնակեր սարդին առաջին անգամ տեսանկարահանել են: Այս մասին հայտնում է National Geographic պարբերականը:
Միչիգանի համալսարանից կենսաբանները թռչնակերին նկատել են Պերուի ջունգլիներում, երբ այն արդեն բռնել էր որսը: Պարկամուկը մոտ 30 վայրկյան թույլ դիմադրում էր, որից հետո դադարել է կյանքի նշաններ ցույց տալ: Ականատեսների խոսքով՝ սարդը ափսեի մեծության էր (մոտ 30 սանտիմետր):
Բացի պարկամկան վրա հարձակումից, հետազոտողները վավերացրել են ավելի քան տասնյակ դեպքեր, երբ ողնաշարավոր կենդանիները դարձել են անողնաշարավորների որս: Մասնավորապես՝ նրանց հաջողվել է լուսանկարել եւ տեսանկարահանել մողեսներ, օձեր եւ երկկենցաղների թրթուրներ ուտող անողնաշարավորների:
Թռչնակեր սարդերը սնվում են գերազանցապես միջատներով եւ ավելի մանր սարդերով: Դրանից բացի, նրանք հաճախ մանր կրծողների, թռչունների եւ ձկների որս են անում: Ի տարբերություն սարդերի այլ տեսակների՝ թռչնակերները սարդոստայն չեն հյուսում, այլ որսին դարանակալում են: Մեծահասակ առանձնյակների չափերը, ոտքերը հաշվի առնելով, կարող է անցնել 27 սանտիմետրից: Չնայած թռչնակերները թունավոր են, նրանց թույնը մարդու համար վտանգավոր չէ: