Իրանի արտաքին գործերի նախարար Մոհամադ Ջավադ Զարիֆը, որն անցած շաբաթ հրաժարական էր ներկայացրել, չէր իմացել Սիրիայի նախագահ Բաշար Ասադի Թեհրան այցի մասին։ Այս մասին ասել է Իրանի արտաքին քաղաքական գերատեսչության պաշտոնական ներկայացուցիչ Բահրամ Հասեմին, տեղեկացնում է ՏԱՍՍ-ը՝ հղում կատարելով ISNA գործակալությանը։
Ասադի այցի մասին անիրազեկությունը, ինչպես ավելի վաղ տեղեկացրել էին իրանական որոշ լրատվամիջոցներ, իբր կարող էր լինել Զարիֆի հրաժարական տալու պատճառը։ Հասեմին այս առնչությամբ պարզաբանել է, որ Սիրիայի նախագահի ուղեւորության ընթացակարգը հատուկ էր, Իրանի ղեկավարության միայն որոշ ներկայացուցիչներ գիտեին պատվիրակության կազմի մասին, իսկ ԱԳՆ-ն մինչեւ այցի ավարտը տեղեկություն չուներ հյուրերի մակարդակի մասին։
Հասեմին հավելել է, որ Զարիֆը հրաժարականի որոշումը կայացրել է՝ առաջնորդվելով «ոչ թե անձնական պատճառներով, այլ դրական ազդեցություն գործելու, որպեսզի դիվանագիտական գերատեսչությանը վերադարձվի նախկին դիրքը երկրում»։
Ասադի այցը Թեհրան տեղի է ունեցել փետրվարի 25-ին։ Նույն օրը երեկոյան Զարիֆը հայտարարեց հրաժարականի մասին։ Իրանի նախագահ Հասան Ռոհանին չընդունեց նրա հրաժարականը։
ԱԳՆ ղեկավարի կայացրած որոշման պատճառների մի քանի տարբերակ հնչեց։ Մասնավորապես, FARS գործակալությունը տեղեկացրել է, որ Զարիֆը հեռանում է իբր նախագահի գրասենյակի հետ տարաձայնությունների պատճառով այն բանից հետո, երբ չի տեղեկացվել նախագահ Ասադի Թեհրան կատարելիք այցի մասին։
Ինքը՝ Զարիֆը, իր հրաժարականն ընդունելու նախագահի հրաժարումից հետո ասել է, որ նրա առաջնահերթություններն են «արտաքին քաղաքականության խթանումը, արտաքին գործերի նախարարության հանդեպ վստահության բարձրացումը, Իրանի ազգային շահերի պաշտպանությունը միջազգային ասպարեզում»։