Օրինագծի ընդունումը թույլ կտա ժամանակ շահել խնդրի ինստիտուցիոնալ լուծումը գտնելու համար։ Այս մասին մարտի 5-ին Ազգային ժողովի նիստում, «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություններ մտցնելու օրինագծի քննարկման ընթացքում ասել է «Իմ քայլը» դաշինքի պատգամավոր Մխիթար Հայրապետյանը։ Նրա խոսքով՝ իրենց կողմից պետք է լինի հստակ դիրքորոշում, անգամ եթե այն ցավոտ լինի։
Նշենք, որ մինչ այդ Հայաստանի պաշտպանության նախարարը ներկայացրել էր 27 տարեկանը լրացած եւ պարտադիր զինծառայություն չանցած քաղաքացիների թվի վերաբերյալ վիճակագրություն։ Գերատեսչությունում հայտարարել են, որ 2003-ից ընդհանուր առմամբ 9985 քաղաքացի օրենքով սահմանված կարգով վճարներ է մուծել եւ ազատվել քրեական պատասխանատվությունից։ 11.8 միլիարդ դրամ փոխանցվել է պաշտպանության նախարարության հատուկ հաշվին։
Միեւնույն ժամանակ, 2017 թվականի դեկտեմբերին, ներկայացնելով նման փոփոխություններ, կառավարությունը հավաստիացրել էր, որ այդ որոշումն ընդունվում է վերջին անգամ, եւ խուսափողներն այլեւս նման հնարավորություն չեն ստանա։ Սակայն նոր իշխանությունները հավանություն են տվել փոփոխությունների նախագծին, որոնց համաձայն՝ մինչեւ 2018 թվականի մարտի 1-ը 27-ը լրացրած տղաներին նորից տրվել է հայրենիք վերադառնալու հնարավորություն։
Հիշեցնենք, որ օրինագիծն առաջին ընթերցմամբ արժանացել է պատգամավորների միաձայն հավանությանը։ Խորհրդարանը նաեւ կողմ է քվեարկել, որպեսզի օրինագիծը քննարկվի երկրորդ ընթերցմամբ, արագացված 24-ժամյա ռեժիմով։ Օրենքը, որը թույլ է տալիս վճարել բանակում ծառայության դիմաց, կգործի մինչեւ տարեվերջ։