Հազիվ էին հասցրել ձեռնաշղթա հագցնել Ադրբեջանին հանձնված Ֆահրեդին Աբասովին, երբ թալիշների ազգային շարժման ներկայացուցիչը հռչակվեց դավաճան, որի մեղքը անգամ չի էլ քննարկվում։
Ինչպես տեղեկացնում են ադրբեջանական լրատվամիջոցները, ելույթ ունենալով խորհրդարանի լիագումար նիստում՝ պատգամավոր Հուդրաթ Հասանղուլիեւն ասել է. «Օրերս հայրենիքի դավաճան Ֆահրեդին Աբասովը արտահանձնվել է Ադրբեջանին։ Համոզված եմ, որ նա արժանի պատիժ կստանա հայրենիքի դավաճանության պատճառով»։
Այսպիսով, ստորագրելով իրավաբանական անգրագիտության տակ (քաղաքակիրթ աշխարհում մեղքը որոշում է դատարանը, բայց Ադրբեջանում, հնարավոր է, ամեն բան այլ կերպ է)՝ խորհրդարանականը փորձց ցուցում տալ իրավապահ մարմիններին եւ դատական համակարգին, հետն էլ՝ վախեցրեց անցանկալիներին. «Համաշխարհային պրակտիկան ցույց է տալիս, որ նման մարդիկ պետք է պատասխանատվության ենթարկվեն, որպեսզի մյուսները եզրակացություններ անեն»։
Հիշեցնենք, որ Ֆահրեդին Աբասովը 2019 թվականի փետրվարի 28-ին տեղափոխվել է Ռուսաստանից եւ կալանվել Բաքվի օդանավակայանում։ Ներկայում հետաքննություն է վարվում «Ադրբեջանի քաղաքացի Ֆահրեդին Աբասովի Հայաստան այցելությունների, Հայաստանի հատուկ ծառայություների աշխատակիցների հետ նրա հանդիպումների եւ կապերի բնույթի, Ադրբեջանի եւ նրա տարածքային ամբողջականության դեմ նրա կոչերի վերաբերյալ՝ Հայաստանում իրականացվող միջոցառումներին ուղղակի ներգրավմամբ, որոնք տարածվել են ԶԼՄ-ում եւ սոցցանցերում, ինչպես նաեւ այլ հարցերի առնչությամբ», տեղեկացնում են ադրբեջանական լրատվամիջոցները։