Հայաստանի Ազգային ժողովը մարտի 6-ին երկրորդ ընթերցմամբ ընդունեց օրենք «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություններ կատարելու մասին։
Ավելի վաղ, ներկայացնելով իր նախաձեռնած օրինագիծը, հիմնական զեկուցող՝ «Լուսավոր Հայաստան» կուսակցության խորհրդարանական խմբակցության քարտուղար Գեւորգ Գորգիսյանը նշել էր, որ դա վերաբերելու է մոտ երկու հազար մարդու։ Գորգիսյանը պարզաբանել էր, որ փոփոխությունները հնարավորություն կտան այն քաղաքացիներին, որոնց 27-ը լրացել է 2018 թվականին եւ մինչեւ 2019-ի մարտի 1-ը, վերադառնալ Հայաստան, վճարել համապատասխան գումար որպես տուգանք եւ ազատվել քրեական հետապնդումից։ Միեւնույն ժամանակ, պատգամավորը տեղեկացրել էր, որ խուսափողների ընդհանուր թիվը կազմում է 10940 մարդ, եւ նրանք բոլորը այսօրվա դրությամբ հետախուզման մեջ են։
Քվեարկության ավարտին Հայաստանի խորհրդարանի նախագահ Արարատ Միրզոյանն ասաց, որ խորհրդարանի հավանությանն արժանացած բոլոր օրինագծերն առաջարկվել են խորհրդարանական ընդդիմության կողմից։ Նա հույս է հայտնել, որ հաջորդ օրինագծերի կառուցողական քննարկումը կշարունակվի նաեւ հետագայում։