Թուրքիայի պաշտպանության նախարար Հուլուսի Աքարը հայտարարել է, որ ուրբաթ Ռուսաստանը եւ Թուրքիան կսկսեն համատեղ պարեկել սիրիական Իդլիբի տարածքները, տեղեկացնում է Անատոլիական գործակալությունը։
Նախարարը նշել է, որ Թուրքիան կպարեկի ապառազմականացված գոտին, իսկ Ռուսաստանը՝ լիցքաթափման գոտու արտաքին պարագիծը։ Նրա խոսքով՝ համատեղ պարեկումը կարեւոր է հրադադարի ռեժիմի պահպանման եւ Սիրիայի հյուսիս-արեւմուտքում կայունության ապահովման տեսակետից։
Թուրքիայի պաշտպանության նախարարն ընդգծել է, որ Անկարան Բաշար Ասադի ռեժիմի հետ կապեր չի պահպանում։ Բանակցությունները վարվում են բացառապես Ռուսաստանի, իսկ անհրաժեշտության դեպքում՝ Իրանի հետ։
«Անկարայի հիմնական դժգոհությունը Բաշար Ասադի ռեժիմից կապված է Իդլիբում հրադադարի խախտման հետ։ Թուրքիան սպասում է, որ Ասադի կողմնակիցները հետեւեն հրադադարին, եւ Մոսկվան սիրիական ռեժիմից փորձում է հասնել գնդակոծությունների դադարեցման Սիրիայի հյուսիս-արեւմուտքում»,- ասել է նախարարը։
Իդլիբի նահանգում ապառազմականացված գոտու ստեղծման մասին պայմանավորվածությունը Ռուսաստանի եւ Թուրքիայի միջեւ ձեռք է բերվել Սոչիում սեպտեմբերին։ Պայմանների համաձայն՝ մինչեւ հոկտեմբերի կես զինված խմբավորումները եւ սիրիական բանակը պետք է դուրս բերեն նշված շրջանից ծանր սպառազինությունը, այնուհետեւ նախատեսվում է սկսել ռուս-թուրքական պարեկում սահմանազատիչ գծում եւ Հալեպ-Լաթաքիա եւ Հալեպ-Համա մայրուղիների բացումը։
