Սաուդյան Արաբիայի կառավարությունը կթեթեւացնի վիզային ռեժիմը օտարերկրյա հյուրերի համար՝ թագավորության տնտեսության եւ ոչ կրոնական տուրիզմի զարգացման միջոցառումների շրջանակում։ Փորձագետների կանխատեսմամբ՝ դա տեղի կունենա 2019 թվականի վերջին։ Սաուդյան Արաբիայի պաշտոնյաներն ասել են, որ վիզան կարելի է ձեւակերպել ինտերնետում, մի քանի րոպեում։ Հետո այն էլեկտրոնային փոստով կուղարկվի 24 ժամվա ընթացքում։ Դեսպանություն կամ հյուպատոսություն այցելելու կարիք չի լինի, տեղեկացնում է Turizm-ը։
Սաուդյան Արաբիան երկար ժամանակ համարվում էր ամենափակ երկրներից մեկը զբոսաշրջիկների համար։ Գործող համակարգը թույլ կտա վիզա ստանալ միայն երկու շաբաթով՝ գործարարների եւ ուխտագնացների համար, որոնք Մեքքա եւ Մեդինա են գալիս աշխարհի բոլոր ծայրերից։ Սպասվում է, որ էլեկտրոնային փաստաթղթեր մտցնելը կխթանի զբոսաշրջիկների հոսքեր, իսկ դա իր հերթին կամրապնդի Սաուդյան Արաբիայի տնտեսությունը։ Նման վիզաներ կարող են ստանալ օտարերկրյա հյուրերը, ովքեր ցանկանում են թագավորությունում այցելել մարզական միջոցառումների եւ համերգների։
Ինչպես գրում է Al-Arabiya-ն, Սաուդյան Արաբիայում միայն 2018-ին են կինոթատրոններ բացվել։ Դրան հաջորդել է երաժշտական համերգների եւ միջազգային մարզական միջոցառումների կազմակերպումը։ Դրանց թվում են Formula E Prix մրցավազքերը։ Մշակման փուլում են մի շարք այլ միջոցառումներ։ Դրանց թվում է Ամաալա քաղաքի բացումը, որը դառնալու է շքեղ հանգստավայր Սաուդյան Արաբիայի հյուսիսարեւմտյան ափին։ Կստեղծվի Քիդիա զվարճանքների պարկը Էր Ռիադից մեկ ժամ հեռավորության վրա։ Ակնկալվում է, որ այն կկարողանա ներգրավել տարեկան 1,5 մլն օտարերկրացի հյուրի։ Պարկի բացումը նախատեսված է 2022 թվականին։