Ներդրումներ Հայաստան բերելու համար իրական հիմքեր են պետք, իսկ հայտարարությունները, անգամ ամենաշքեղ, ամենատիեզերական հայտարարությունները ցանկացած ներդրողի համար ծիծաղելի կարող է լինել: Այս մասին NEWS.am-ի հետ զրույցում նշեց ԱԺ նախկին պտգամավոր, տնտեսագետ Վարդան Բոստանջյանը:
Նրա խոսքով, ներդրումների համար ինստիտուցիոնալ, իրավական կուռ հիմքեր են պետք եւ ընդգծված պետական երաշխիքներ. «Այդ բոլորի բացակայության պարագայում ցանկացած տիպի սրտաճմլիկ հայտարարություն չի կարող խաբել ցանկացած ներդրողի, լինի հայրենական, թե օտարերկրյա:
Ներդրումը առնչվում է դժվար կառավարելի ռիսկերի հետ: Ներդրողները, որոնք ակնկալում են շահույթի ստացում ժամանակային առումով ավելի ուշ, նրանց առջեւ կանգնած են շատ մեծ ռիսկեր: Այդ ռիսկերը օրենսդրաիրավական են, նաեւ պետք է լինի նորմալ դատաիրավական համակարգ, պետական երաշխիքներ: Այդ բոլոր հիմքերը պետք է լինեն ընդգծված ու պարտադիր:
Աշխարհի ամենատարբեր երկրներում, որտեղ ներդրումային գործունեությունը գտնվում է չափազանց բարձր մակարդակում, միանգամից կարելի է այնտեղից օրինակ վերցրել ու տեսնել, թե ինչ հիմքերի վրա է կառուցվում ներդրումային գործունեությունը»,-հայտարարեց Բոստանջյանը:
