Զբոսաշրջիկները չափազանց անհոգ են ջրի մոտ, հանգիստ՝ արձակուրդի ժամանակ, եւ այդ պատճառով խորտակվելու վտանգը նրանց համար ավելի բարձր է, քան, օրինակ, տեղաբնակների մոտ, հաղորդում է ՌԻԱ-Նովոստի-ն՝ հղում կատարելով The Conversation-ին:
Վինդզորի համալսարանի գիտնականների վերջին հետազոտությունները վկայում են, որ ճանապարհորդների մեծամասնությունը համարում է, որ հանգստավայրերն ու լողափերը տեղակայված են լողալու համար անվտանգ գոտիներին կից: Այդ զգացողությունն ուժգնանում է, երբ այնտեղ ծառուղիները խնամված են եւ փակցված են գովազդային պաստառներ: Ճանապարհորդները հակված են նաեւ համարել, որ զբոսավարները գիտեն՝ վտանգավոր է արդյոք լողափը եւ արժե արդյոք այնտեղ լողալ:
Սակայն դա միշտ չէ այդպես, այդ պատճառով զբոսաշրջիկների համար ծովում լողալիս զոհվելու վտանգն ավելի բարձր է, քան տեղաբնակների մոտ: Որպես կանոն, ճանապարհորդները ծանոթ չեն լողափերին եւ վտանգներին, որոնք նրանց սպասվում են այս կամ այն ջրերում՝ կապված հոսաքնի կամ ալիքների հետ:
Այդ գիտելիքների պակասը կրկնապատկվում է լեզվական պատնեշի, լողալու ունակության մեջ չափազանց մեծ ինքնավստահության եւ մեծ քանակությամբ գարեջուր օգտագործելու պատճառով:
Երբեմն զբոսաշրջիկները պարզապես չեն մտածում անվտանգության մասին, քանի որ լողափերն առաջարկում են բազմաթիվ ժամանցային տարբերակներ եւ գայթակղություններ՝ ոգելից խմիչքներ, հետաքրքիր խանութներ, խաղեր եւ հուշանվերներով կրպակներ, իսկ շրջապատող բազմաթիվ մարդիկ թույլ են տալիս մտածել, որ ջուրը վտանգավոր չէ:
Մինչդեռ մի շարք հայտնի լողափերում չկան փրկարարներ կամ վտանգավոր ալիքների, մակընթացության, շնաձկների ու մեդուզաների եւ այլ ծովային բնակիչների, ինչպես նաեւ հետահար հոսանքների մասին ազդանշանային համակարգեր: Խուճապահար մարդիկ ի վիճակի չեն գնահատել իրավիճակը եւ ափ վերադառնալ: Հաճախ, հայտնվելով հետահար հոսանքներում, որոնք կարող են տանել լողորդների ափից հեռու, վախեցած սկսնակները սխալմամբ սկսում են լողալ հոսանքին հակառակ, այլ ոչ ափի երկայնքով, եւ զուր վատնում են իրենց ուժերը՝ մնալով նույն տեղում:
Անգամ եթե մարդիկ տեղյակ են հետահար հոսանքների եւ մյուս վտանգների մասին, նրանք կարող են սխալ որոշումներ ընդունել՝ հենվելով հասակակիցների կամ ընկերների վարքագծի վրա: Ընդ որում՝ լողալու կամ չլողալու վերաբերյալ ճիշտ որոշումներ կայացնելու զբոսաշրջիկների շանսերը երեք անգամ պակաս են, քան տեղաբնակների շրջանում, նշում են գիտնականները:
Հանգստացողները պետք է իրազեկված լինեն, որ անգամ հայտնի զբոսաշրջային վայրերում լողափերը կարող են վտանգ ներկայացնել, պնդում են գիտնականները: Այդ պատճառով ավելի լավ է լողալ այն վայրերում, որտեղ կան փրկարարներ: Լողափի հասանելիությունը, գեղեցկությունը, հանրաճանաչությունն ու հանգստավայրին մոտ գտնվելը դեռևս անվտանգության երաշխիք չեն:
