Հայաստանը համաձայն է ԵԱՀԿ-ում նախագահող Սլովակիայի առաջնահերթություններին: Այս մասին նշեց Հայաստանի ԱԳ նախարար Զոհրաբ Մնացականյանը ԵԱՀԿ գործող նախագահ, Սլովակիայի ԱԳ նախարար Միրոսլավ Լայչակի հետ մամուլի ասուլիսի ժամանակ:
Նախարարը նշեց, որ Հայաստանը համաձայն է սլովակյան կողմի մոտեցմանը, որի կարծիքով՝ ցանկացած հակամարտության կարգավորման ժամանակ պետք է հաշվի առնվեն մարդկանց իրավունքները եւ կամքը:
ԵԱՀԿ տարածքում չպետք է լինի միջազգային հանրության ներկայացուցիչներին անհասանելի վայր, եւ այս սկզբունքը տարածվում է նաեւ Լեռնային Ղարաբաղի վրա:
Նախարարը հաստատեց Հայաստանի հանձնառությունը միջազգային իրավունքին եւ ընդգծեց ժողովուրդների ինքնորոշման իրավունքի սկզբունքի իրականացման կարեւորությունը: «Հայաստանի համար առաջնահերթություն են եղել եւ մնում Արցախի անվտանգությունն ու կարգավիճակը, ինչպես նաեւ բանակցություններին նրա ներգրավվածությունը»,- նշեց Մնացականյանը: Այս ենթատեքստում նա հիշեցրեց, որ Արցախի ժողովուրդը իր հայրենիքում իր ճակատագիրն ինքը պետք է որոշի:
Նախարարը նաեւ կարեւորեց վստահության մթնոլորտի ստեղծումը, ռիսկերի նվազեցումը, ինչպես քննարկել էին Դուշանբեում եւ ավելի վաղ Վիեննայի ու Սանկտ Պետերբուրգի գագաթնաժողովներում: «Հենց այս օրերին Ադրբեջանի կողմից լայնամասշտաբ չհայտարարված զորավարժությունների անցկացումը, իր իսկ ստանձնած միջազգային պարտավորություններին հակառակ, չի նպաստում նշված վստահության մթնոլորտի ստեղծմանը»,- շեշտեց նախարարը:
