Վարչապետ ՆԻկոլ Փաշինյանն անդրադարձել է երեք սկզբունքներին եւ 6 տարրերին, եւ նա շատ պարզ է եղել իր հայտարարության մեջ. խոսքը եղել է տարբերվող մեկնաբանությունների մասին եւ ասվել է, որ մենք չպետք է նպատակ ունենանք լեզվակռվի մեջ լինելու, այլ պետք է հստակեցնել երկու կողմերի մոոտեցումները ընկալումների, մեկնաբանությունների առումով, թե ինչ են նշանակում այդ երեք սկզբունքներն ու 6 տարրերը: Այս մասին այսօր՝ մարտի 13-ին, լրագրողների հետ հանդիպման ժամանակ նշեց ՀՀ ԱԳ նախարար Զոհրաբ Մնացականյանը՝ անդրադառնալով նախօրեին ՀՀ վարչապետի ելույթին Ստեփանակերտում, որտեղ նա Անվտանգության խորհրդի նիստում խոսել էր Մադրիդյան սկզբունքների հստակեցման անհրաժեշտության մասին։
Հարցին, թե եթե մադրիդյան սկզբունքները վերանայվեն, արդյոք խարխուլ բանակցային գործընթացը չի գնա փակուղի, Մնացականյանը պատասխանեց. «Ընկալել դա՝ վերանայում… կարծում եմ՝ վարչապետը որեւէ կերպ նման ազդակ չի տվել, այլ տվել է շատ ավելի կարեւոր ազդակ, որ մեզ անհրաժեշտ է աշխատել՝ բացառելու այնպիսի մեկնաբանությունները, այնպիսի մոտեցումները, ընկալումները, որոնք միակողմանի են դարձնում այդ փաթեթը եւ խնդիր են առաջացնում ընկալումների առումով, թե ինչ է սա նշանակում։ Խնդիրը վերաբերում է ընկալումներին, թե որքանով մոտ են կողմերի ընկալումները այս փաթեթի վերաբերյալ:
Վարչապետը շատ հստակ անդրադարձել է դրան եւ շատ դժվար է որեւէ բան ավելացնելը: Հուսով եմ, որ կարողանանք եւս մեկ անգամ ընթերցել եւ հասկանալ, որ մեր հիմնական շեշտադրումն այն էր, թե որքանով կարող են բացառվել լեզվակռիվներն այս փաթեթի առնչությամբ»: