Nord Stream 2 կոնսորցիումը կարող է ԵՄ իրավասությունից հանել Բալթիկ ծովի հատակով անցկացվող երկրորդ գազատարի մեծ մասը, տեղեկացնում է DW-ն՝ հղում կատարելով Financial Times-ին։
«Հյուսիսային հոսք-2» նախագծի ղեկավարությունը դիտարկում է առանձին ընկերություն ստեղծելու հնարավորությունը, որը կկառավարի գազատարի վերջին հատվածը, գրում է պարբերականը մարտի 14-ին՝ վկայակոչելով իրավիճակին ծանոթ երեք աղբյուր։
Այս քայլը կխափանի 9,5 մլրդ դոլար արժողությամբ նախագիծն ամբողջությամբ վերահսկելու ԵՄ ծրագրերը, նշում է թերթը։ Իրադարձությունների այսպիսի զարգացման պարագայում Եվրամիության կանոնները կտարածվեն միայն Գերմանիայի Դաշնային Հանրապետության տարածքային ջրերում գտնվող «Հյուսիսիային հոսք-2»-ի 50 կմ երկարությամբ հատվածի վրա, իսկ գազատարի մնացած մասը՝ մոտ 1200 կմ, կմնա եվրոպական իրավասությունից դուրս։
«Սա իրավական եւ տեխնիկական հարթությունից քննարկումը կտեղափոխի քաղաքական հարթություն»,- պարբերականին ասել է եվրոպացի բարձրաստիճան դիվանագետը։ Ընդ որում՝ համաձայն FT տվյալների՝ գազատարի ծովային հատվածների բաժանման պլանը դեռ չի քննարկվել գերմանական կարգավորիչների հետ, որոնք պատասխանատվություն են կրելու նախագծում եվրոպական օրենսդրության կիրառման համար։
Փետրվարին Եվրամիության երկրների կառավարությունները եւ Եվրախորհրդարանը նախնական համաձայնության են եկել ԵՄ Գազային դիրեկտիվում փոփոխություններ մտցնելու մասին։ Այդ փոփոխությունները դիրեկտիվի գործողությունը տարածում են բոլոր գազատարների վրա, որոնցով վառելիքն առաքվում է Եվրոպա երրորդ երկրներից։ Եվրահանձնաժողովը պահանջում է, որպեսզի երրորդ երկրների խողովակաշարերը գործեն այն նույն կանոններով, ինչ եւ գազատարները ԵՄ ներսում, ինչը պետք է մրցակցություն ապահովի եւ պաշտպանի սպառողների իրավունքները։