Քրայսթչերչում՝ Նոր Զելանդիայի մզկիթներում 49 մարդկանց սպանությունների հիմնական մեղավոր 28-ամյա Բրենտոն Տարանտը մինչեւ ապրիլի 5-ը՝ հաջորդ դատական նիստը, կմնա կալանքի տակ, հաղորդում է BBC News-ը:
Նշվում է, որ նա կասկածվում է առնվազն մեկ սպանությունում:
Ուրբաթ ավստրալացին դատարանի առջեւ էր կանգնել սպիտակ բանտային հագուստով եւ ձեռնաշղթաներով:
Սպասվում է, որ նրա դեմ նոր մեղադրանքներ կներկայացվեն:
Մյուս երկու մեղադրյալները ձերբակալված են: Նրանցից ոչ ոք անցյալում դատվածություն չի ունեցել:
The New Zealand Herald-ը հաղորդում է, որ Բրենտոն Հարիսոն Տարանտը, որը վերջին մի քանի տարիներին ապրում էր Դանիդինում, դատարանի դահլիճում ցույց չի տվել, որ զղջում է եւ լուսանկարահանման ժամանակ նացիստական ժեստեր է ցուցադրել:
Թերթը նաեւ նշում է, որ Քրասյսթչերչում ոստիկանական լրացուցիչ ուժեր են կենտրոնացվել: Նոր Զելանդիայի ոստիկանության կոմիսար Մայք Բուշը լրագրողների համար ճեպազրույցում ասել է, որ լրացուցիչ քաղաք է ժամանել ոստիկանության 125 սպա:
Ավելի վաղ Նոր Զելանդիայի վարչապետ Ջասինդա Արդենը հաղորդել էր, որ ամբողջ երկրով անվտանգության միջոցները զգալիորեն կուժեղացվեն, իսկ ազգային անվտագնության սպառնալիքի աստիճանը ցածրից բարձր աստիճանի է հասցվել:
Վարչապետն այս մասին ասել է երկրի անվտանգության խորհրդից հետո՝ ճեպազրույցի ժամանակ:
Վարչապետը նաեւ նշել է, որ անվտանգության ապահովման նպատակներով կվերանյվի զենքի շրջանառության մասին երկրում գործող օրենսդրությունը:
Ուրբաթ զինված անձինք ներխուժել էին Ալ Նուր եւ Լինվուդ մզկիթները, որտեղ այդ պահին հարյուրավոր մարդիկ կային եւ հրաձգություն սկսել: Հարձակման հետեւանքով, ըստ վերջին տվյալների, մահացել էր 49 մարդ, տասնյակ վիրավորներ տեղափոխվել են հիվանդանոցներ: