Երեւանում տեղի է ունեցել կենդանիների հանդեպ անիմաստ դաժանության հերթական դեպքը։
Ինչպես տեղեկացնում է Pawsitive Rescue Armenia կենդանապաշտպան կազմակերպությունը, միջադեպը տեղի է ունեցել մայրաքաղաքի Էրեբունի թաղամասում։ Աղավնատան տերը եռման ջուր է լցրել հարեւանի կատվի վրա։ Նշվում է, որ աղավնատան տերն առաջին անգամ չէ, որ հաշիվ է տեսնում կենդանիների հետ։ Լուսանկարում երեւում է, որ այրվել են խեղճ կենդանու գլուխը, մռութը, մարմինը։ Կատվին շտապ գնություն է ցուցաբերվել կլինիկայում, հետո նրան վերցրել է տերը։
«Օր չկա, որ նման դեպքեր չլինեն։ Եվ քանի դեպքերի մասին էլ մեզ հայտնի չէ։ Ավելորդ ենք համարում նորից խոսել համապատասխան օրենքի բացակայության ազդեցության մասին։ Բայց խնդրում ենք տարածել այս տեղեկատվությունը, որպեսզի բոլորը տեսնեն, հատկապես իրավասու մարմինները, որ մարդիկ օրեցօր էլ ավելի են դաժանանում եւ դիմում բարբարոսական մեթոդների»,- ասվում է կազմակերպության հայտարարությունում։
Նշենք, որ առայժմ հայտնի չէ՝ մտադի՞ր է արդյոք կատվի տերը դիմել իրավապահ մարմիններին։
