Երբեմն անտառային հրդեհները մարելիս փոքր գործիքները եւ հատուկ միջոցներն ավելի օգտակար ու արդյունավետ են անմատչելի վայրերում, որտեղ չի կարող հասնել ծանր եւ զանգվածային հրշեջ տեխնիկան: Այս մասին մարտի 17-ին «Խոսրովի անտառ» ազգային արգելոցում, «Հայաստանում կլիմայի փոփոխությունների հետեւանքների մեղմումը անտառային եւ դաշտային հրդեհների կառավարման ներուժի զարգացման ճանապարհով» ՄԱԿ Զարգացման ծրագրի շրջանակում ասաց արտակարգ իրավիճակների նախարար Ֆելիքս Ցոլակյանը:

Նա դրական գնահատեց նոր հատուկ տեխնիկան եւ նշեց դրանց կիրառման արդյունավետությունը՝ դրանով իր գոհունակությունը հայտնելով: Ցոլակյանը հիշեցրեց, որ ընդամենը մեկ ամիս առաջ Լոռիի մարզում անտառային հրդեհ էր բռնկվել եւ հրշեջ ուսապայուսակների, լապտերների ու ձեռքի այլ տեխնիկայի սուր անհրաժեշտություն առաջացել:

Նախարարը շնորհակալություն հայտնեց Ռուսաստանին եւ ՄԱԿ-ին երկրին ցուցաբերված անգնահատելի աջակցության համար:

Հարկ է նշել, որ այս ծրագրի շրջանակում հայաստանցի 360 հրշեջ հատուկ սարքավորումներ եւ գործիքներ է ստացել, որոնք նախատեսված են անտառային հրդեհների դեմ պայքարի համար դժվարհասանելի վայրերում։ Ծրագրի ընդհանուր գումարը կազմում է մոտ 1 միլիոն դոլար։ Ծրագիրն իրականացվել է ՄԱԿ գծով եւ լիովին ֆինանսավորվել Ռուսաստանի Դաշնության կողմից՝ Հայաստանում Ռուսաստանի դեսպանության, ինչպես նաեւ Հայաստանի բնապահպանության եւ արտակարգ իրավիճակների նախարարությունների ակտիվ աջակցությամբ։