Հայաստանում Ռուսաստանի Դաշնության արտակարգ եւ լիազոր դեսպան Սերգեյ Կոպիրկինը եւ Եվրոպայի ու ԱՊՀ հարցերով տարածաշրջանային բյուրոյի տնօրեն Միրյանա Շպոլյարիչ Էգերը «Գյուղական ինտեգրված զբոսաշրջության զարգացում» ՄԱԿ զարգացման ծրագրի շրջանակում Փոքր Վեդի գյուղում այցելել են «Գաստրո դվոր»:
Նրանք համտեսել են հայկական ավանդական լավաշը՝ դառնալով հին հայկական լեգենդար հացի թխման անմիջական գործընթացի ականատեսը:
«Նախագիծն իրականացվում է տեղացի այն ընտանիքների հետ, որոնք ցանկանում են եւ հնարավորություն ունեն ընդունելու զբոսաշրջիկների»,- պարզաբանեց ծրագրի համակարգող Արման Վանեսյանը՝ հավելելով, որ այս նոր զբոսաշրջային ուղղությունը աշխատանքով կապահովի 10-15 տեղացիների:
Վանեսյանի խոսքով՝ ծրագրի նպատակն է Հայաստանի բոլոր մարզերում գյուղական զբոսաշրջության զարգացումը, ինչպես նաեւ տեղական գյուղական համայնքների երկամուտներ ստանալու հնարավորությունների մեծացումը:
Ընդ որում՝ նա նշեց, որ ծրագրի ընդհանուր բյուջեն կազմել է 3 մլն դոլար: Ծրագրի համակարգողը հայտնեց, որ ՄԱԿ ԶԾ գծով գումարը հատկացրել է Ռուսաստանի Դաշնությունը Հայաստանում գյուղական զբոսաշրջության զարգացման համար:
«Ծրագիրը գործարկվել է դեռեւս 2016 թվականին: Մենք նպատակ ունեինք աշխատատեղեր ստեղծել 60 գյուղերում՝ օգտագործելով զբոսաշրջության ներուժը: Ծրագհրի շրջանակում ավելի քան 920 գյուղի գույքագրում ենք կատարել: Ներկա պահին իրականացվում է 45 ծրագիր»,- շեշտեց Վանեսյանը: