ՀՀ Կոտայքի մարզպետ Ռոմանոս Պետրոսյանը մարտի 15-ին լրատվամիջոցներին տված հարցազրույցներից մեկում իրեն իրավունք է վերապահել գնահատականներ հնչեցնել Աբովյան համայնքի ավագանու գործունեության վերաբերյալ։ Այս մասին հայտարարություն է տարածել Աբովյան համայնքի ավագանին:
Հայտարարությունում նաեւ ասվում է.
«Ընդունելով մարզպետի հրավերը՝ ունեցել ենք կառուցողական, ողջունելի, ինչպես նաեւ ընկերական հանդիպում, ի շահ եւ բարորություն Աբովյան համայնքի եւ աբովյանցու՝ ակնկալելով հետագա կառուցողական համագործակցություն: Այդքանից հետո Աբովյանի ավագանու հնչեցված պատասխանները ոչ ադեկվատ համարելը առնվազն կոռեկտ եւ ադեկվատ չէ:
Համայնքի ավագանին տեղական ինքնակառավարման ընտրովի մարմին է, ստացել է աբովյանցու վստահության քվեն եւ հաշվետու է բացառապես իր ընտրողների, այլ ոչ թե մարզային իշխանությունների առջեւ։
Համայնքի ավագանին իր գործունեությամբ նպաստել եւ մասնակից է եղել մեր սիրելի քաղաքի արդյունավետ կառավարմանը եւ զարգացմանը:
Մեր վրդովմունքն ենք հայտնում հարցազրույցում մարզպետի արտահայտած մտքերի կապակցությամբ:
Հորդորում ենք պարոն մարզպետին այսուհետ զերծ մնալ նման կարգի գնահատականներ հնչեցնելուց եւ մնալ օրենքով իրեն վերապահված լիազորությունների շրջանակներում»:
Ավելի վաղ NEWS.am-ը հայտնել էր, որ Կոտայքի մարզպետ Ռոմանոս Պետրոսյանի եւ Աբովյանի քաղաքապետ Վահագն Գեւորգյանի միջեւ առճակատումը շարունակվում է։
«Սա սաբոտաժ է». Կոտայքի մարզպետի եւ Աբովյանի քաղաքապետի առճակատումը շարունակվում է