Ադրբեջանի ԱԳ նախկին նախարար Թոֆիկ Զուլֆուգարովը քննադատել է իր երկրի իշխանությունների դիրքորոշումը ազգությամբ հայ քաղաքացիների մուտքի արգելքի հարցում:
«Չի կարելի Ադրբեջան այցելելու իրավունքը մերժել էթնիկ, կրոնական եւ ռասայական հիմքով: Սակայն մենք կարող ենք հատուկ պայմաններ ստեղծել՝ այդ իավունքից չզրկելով: Այդ դեպքում մեր դիրքորոշումը քննադատության չի ենթարկվի: Մենք թիրախավորվում ենք, երբ մուտքի արգելքի համար հիմք ենք ընդունում էթնիկ պատկանելությունը՝ նրանց զրկելով մեր երկիր այցելելու իրավունքից: Նույն հաջողությամբ մենք կարող էինք ասել, որ, օրինակ, արգելում ենք Աֆրիկայի սեւամորթ բնակիչներին Ադրբեջան ժամանել»,- Զուլֆուգարովն այսպիսի կարծիք է հայտնել Minval.az-ի հետ հարցազրույցում՝ մեկնաբանելով ՌԴ ԱԳՆ խորհուրդը՝ ՌԴ հայազգի քաղաքացիներին Ադրբեջան չայցելելու մասին:
Դիվանագետի կարծիքով՝ դիրքորոշումը, որն արտահայտել է Ադրբեջանի արտաքին քաղաքականության գերատեսչությունը, շահեկան չէ: «Անհրաժեշտ է պայմաններ առաջ քաշել, որոնց համաձայն հայազգի անձինք մեր երկիր ժամանելուց հետո կձերբակալվեն եւ 2 շաբաթ կիրականացվի նրանց ստուգումը: Միայն դրանից հետո հնարավոր կլինի նրանց թույլ տալ մտնել երկրի տարածք»,- կարծում է Զուլֆուգարովը:
Նրա կարծիքով՝ Բաքուն պետք է նշեր, որ Ռուսաստանի Դաշնությունը խախտում է բարեկամության եւ համագործակցության մասին պայմանագիրը, որի համաձայն անթույլատրելի է պետության ինքնիշխանության եւ տարածքային ամբողջականության դեմ որեւէ գործողություն: «Եթե մեր դիրքորոշումը շարադրվեր նշված ձեւաչափով, կարծում եմ, որ բոլորին ամեն ինչ հասկանալի կլիներ: Իսկ երբ մենք այս ամենը պատճառաբանում ենք այն հանգամանքով, որ չենք կարող ապահովել այդ անձանց անվտանգությունը, ապա մեր սեփական դիրքորոշումը փոքր-ինչ վնսակար է: Այս պատճառով էլ այն քննադատության է ենթարկվում: Խոսել այն մասին, որ մենք չենք կարող ապահովել նրանց անվտանգությունը, քանի որ պատերազմական վիճակում ենք, մեղմ ասած պրոֆեսիոնալ չէ»,- շեշտել է դիվանագետը:
Թ. Զուլֆուգարովը հարց է տալիս. «Եթե Միացյալ Նահանգները վիզա տրամադրելիս ստուգում է ֆինանսական վիճակը, քիչ է մնում առողջական վիճակը եւ ձեր աչքերի գույնը, ապա ինչու մենք չենք կարող հատուկ պայմաններ կիրառել մեր շահերի պաշտպանության համար»:
«Նույնը վերաբերում է նաեւ Ռուսաստանին: Սա ցանկացած պետության իքնիշխան իրավունքն է: Բայց մեր պաշտպանությունը պետք է կառուցվի ոչ թե էթնիկ հիմքի վրա, կամ սեփական թուլության հայտարարագրման: Այն պետք է կառուցվի այլ սկզբունքների վրա, որոնց համաձայն այդ անձանց դեմ պետք է կիրառվի երկարաժամկետ ուսումնասիրություն: Օրինակ՝ Ադրբեջանի Միգրացիոն ծառայությունը մեկուսացնում է այդ քաղաքացուն, նրան խուց են տանում: Իսկ համապատասխան կառույցների աշխատակիցները երկու շաբաթ տվյալներն ուսումնասիրում են: Ստուգման արդյունքներով կարելի է հայտարարել, որ երկիրն այցն անցանկալի է: Իսկ թե ինչ պատճառով, մենք մտադիր չենք նրան պարզաբանել»,- ամփոփել է ԱԳՆ նախկին ղեկավարը: