Եվրոպական միությունն այսօր՝ մարտի 18-ին, հայտարարել է Եվրամիության աջակցությունը Հայաստանի երիտասարդներին ամրապնդելու իր պլանների մասին՝ մեկնարկ է տրվում ՀՀ կառավարության հետ երկխոսություն կրթության ոլորտի բարեփոխումների շուրջ եւ նոր կրթական կենտրոնի, որը նախապատրաստելու է գիտության ոլորտի ուսանողներ եւ երիտասարդ մասնագետներ՝ աշխատաշուկայի համար:
Հայաստանում ԵՄ պատվիրակությունից NEWS.am-ին հայտնում են, որ Եվրոպական հանձնաժողովի (ԵՀ) հարեւանության եւ ընդլայնման բանակցությունների գլխավոր տնօրինության հարեւանության հարցերով տնօրեն Լոուրենս Մերեդիթն իր այցի շրջանակում եւ Ուսուցման եվրոպական հիմնադրամը` ԵՄ գործակալությունը, որն աջակցում է Եվրոպական հարեւանության երկրներին նախաձեռնել բարեփոխումներ կրթության եւ զբաղվածության քաղաքականության ոլորտում, պաշտոնապես մեկնարկ են տվել ԵՄ-Հայաստան կրթության ոլորտի բարեփոխումների շուրջ երկխոսությանը:
Քննարկման շրջանակներում տեղի է ունեցել նաեւ ԵՀ տնօրենի հանդիպումը ՀՀ կրթության եւ գիտության նախարար Արայիկ Հարությունյանի հետ, որի նպատակն է կրթության ոլորտի հիմնական խնդիրների համար անհրաժեշտ լուծումների ուրվագծումը:
Այցի շրջանակում, ԵՀ տնօրեն Լոուրենս Մերեդիթը՝ «Թումո» ստեղծարար տեխնոլոգիաների կենտրոնի հետ համատեղ, կհայտարարի նաեւ ԵՄ ԹՈՒՄՈ ինժեներական եւ կիրառական գիտությունների համալիր ծրագրի մեկնարկը:
Եվրոպական միության կողմից ֆինանսավորվող այս նորաստեղծ կենտրոնի նպատակն է բարձրացնել կրթության որակը Հայաստանում գիտության, տեխնոլոգիայի, ճարտարագիտության եւ մաթեմատիկայի (STEM) բնագավառներում:
«Եվրոպական միության աջակցությունը երիտասարդներին Հայաստանի հետ համագործակցության առանցքային ուղղություններից է, որը Արեւելյան գործընկերության զարկերակն է: Ապահովելով ուսումնառության, աշխատանքի եւ հասարակության լիարժեք մասնակից լինելու համար անհրաժեշտ պայմաններ երիտասարդների համար, մենք օգնում ենք նրանց իրացնել առկա ներուժը եւ դառնալ ապագա առաջնորդներ եւ ձեռներեցներ», այցի ընթացքում նշել է Լ. Մերեդիթը:
Եվրոպական հանձնաժողովի տնօրենի այցելության ընթացքում նախատեսված են նաեւ հանդիպումներ դիվանագիտական կորպուսի, միջազգային ֆինանսական կառույցների, քաղաքացիական հասարակության ներկայացուցիչների հետ, ինչպես նաեւ հայաստանցի երիտասարդների եւ ուսանողների հետ ոչ-պաշտոնական երկխոսություն՝ ԵՄ-Հայաստան համագործակցության ներկա փուլի եւ ընթացիկ հարցերի շուրջ:
Կրթական բարեփոխումների շուրջ ԵՄ-Հայաստան երկխոսություն
Համապարփակ եւ ընդլայնված գործընկերության համաձայնագրի (ՀԸԳՀ), ՀՀ կառավարության հնգամյա ծրագրի եւ կրթության զարգացման ռազմավարության շրջանակներում, կրթության քաղաքականության վերաբերյալ ԵՄ-Հայաստան երկխոսությունն ուղղված է Հայաստանի կրթության ոլորտի բարեփոխումների հիմնական ուղղությունների ու նպատակների ուրվագծմանն ու դրանց իրականացման ճանապարհային քարտեզի մշակմանը, ինչպես նաեւ կրթության ոլորտում ԵՄ-Հայաստան համագործակցության հետագա ուղղություների կանխորոշմանը:
Սրան կաջակցի Թուրինի գործընթացը, որը հետեւում է Եվրոպական միության (ԵՄ) գործընկեր երկրներում մասնագիտական կրթության եւ ուսուցման (ՄԿՈՒ) ոլորտի զարգացումներին: Թուրինի գործընթացի առանցքային սկզբունքը մասնակից երկրների բոլոր շահագրգիռ կողմերի, այդ թվում՝ սոցիալական գործընկերների եւ քաղաքացիական հասարակության պատկանելությունն ու մասնակցությունն է: Թուրինի գործընթացը գործընկեր երկրներին հնարավորություն է տալիս մշտադիտարկել ՄԿՈՒ բարեփոխումների իրականացումը, գնահատել առաջընթացն ու ազդեցությունը քաղաքացիների վրա եւ համաձայնեցնել ապագա գերակայությունները:
ԵՄ «Թումո» ինժեներական եւ կիրառական գիտությունների համալիր
Ծրագրի մեկնարկին նախատեսվում է Եվրոպական միության եւ իրականացնող գործընկեր «Թումո» ստեղծարար տեխնոլոգիաների կենտրոնի միջեւ պայմանագրի հրապարակման արարողություն, որից հետո տեղի կունենա խորհրդանշական հիմնարկեք: Ծրագրի շրջանակներում նախատեսվում է կառուցել «ԵՄ ԹՈՒՄՈ Ինժեներական եւ կիրառական գիտությունների համալիր», որը կընդգրկի մի շարք կազմակերպություններ, նպաստելով STEM մասնագիտություններով կրթության որակի բարձրացմանը՝ Հայաստանում:
Կենտրոնում կմատուցվի ոչ-ֆորմալ կրթություն ավելի քան 18 STEM մասնագիտություններով, ինչպես նաեւ կհիմնադրվի նորարարական էկոհամակարգ հիմնված պետական եւ մասնավոր հատվածների շահագրգիռ դերակատարների միջեւ գործընկերության վրա: Ծրագիրն իրականացվում է «Թումո»-ի կողմից, որը հանդիսանում է նորարարական կրթություն ոլորտում հայտնի առաջատար ՀԿ-ն՝ Հայաստանում: Ծրագրի համատեղ իրականացնող գործընկեր Հայաստանում ֆրանսիական համալսարանի կողմից կհիմնադրվի նոր ֆակուլտետ, որը կապահովի STEM ֆորմալ կրթության որակի բարձրացում: Ծրագրի տեւողությունն է 5 տարի:
ԵՄ-ն՝ հանուն երիտասարդների
Եվրոպական միությունն արդեն իրականացնում է երիտասարդների աջակցությանն ուղղված տարբեր նախաձեռնություններ եւ ծրագրեր: Էրազմուս+-ը հանդիսանում է կրթության, վերապատրաստման, երիտասարդության եւ սպորտի աջակցության առաջատար ծրագիրը՝ Եվրոպայում: ԵՄ-ն՝ հանուն երիտասարդների նախաձեռնությամբ իրականացվում է չորս ծրագիր, որոնք աշխատում են այդ թվում հայաստանցի երիտասարդների հետ` բարձրացնելու երիտասարդների աշխատունակությունը, զարգացնելու անհրաժեշտ հմտություններ եւ ակտիվացնելու երիտասարդների մասնակցությունը հասարակական կյանքում:
Շուտով կմեկնարկի մեկ այլ նախաձեռնություն մշակույթի ոլորտում՝ աջակցելու երիտասարդների ստեղծարար տաղանդին:
