«Armenia needs PayPal» խմբի նախաձեռնությամբ կայացավ PayPal վճարային միջոցի ՝ Հայաստանում ամբողջական գործարկմամբ շահագրգռված ոլորտների ներկայացուցիչների հանդիպում–քննարկումը։ Հանդիպմանը ներկա էին ՀՀ կապի և տրանսպորտի նախարարության ինֆորմացիան տեխնոլոգիաների և թվայնացման վարչության ղեկավար Արման Գալստյանը, «Ինտերնետ հանրություն» ՀԿ անդամ Վահան Հովսեփյանը, Հայաստանում գործող էլեկտրոնային կոմերցիայի, ՏՏ, տուրիզմի, բանկային, հասարակական–բարեգործական ոլորտի ներկայացուցիչներ, ովքեր մտքերի փոխանակում ունեցան և փորձեցին վերհանել PayPal–ի ամբողջական գործարկմանը խոչընդոտող սահմանափակումները, բացերը։

«PayPal-ի ամբողջական գործարկումը Հայաստանում» թեմատիկ վերնագրով հավաքի մոդերատոր Արման Մալունցի խոսքով՝ հանդիպումը արդյունավետ էր հետագա քայլերի ռազմավարության մշակման առումով։ «Քննարկման մասնակիցները առանձնացրին հնարավոր խնդիրները, առաջարկեցին լուծումներ։ Կստեղծվի նաև աշխատանքային խումբ, որը ավելի հստակեցված գործողությունների առաջարկներ կանի»,– նշեց Մալունցը։

Հիշեցնենք, որ Հայաստանում առցանց բիզնես վարող ձեռնարկատերերը մի քանի տարի է, որ պատկան մարմինների առջև բարձրացրել են PayPal վճարային միջոցի ամբողջական գործարկման անհրաժեշտությունը։ Հայաստանի կառավարությունը վերջին 4 տարիների ընթացքում մի քանի պաշտոնական հարցում է կատարել  PayPal–ին ամբողջական գործարկման համար։

Նոր Կառավարությունը PayPal–ի գործարկման վերաբերյալ հայտարարել է վճռականության մասին։